Ötən gün millət vəkili Hadı Rəcəbli maraqlı və vacib bir açıqlama verib. Bildirib ki, özəl klinikalara verilən lisenziyanın ləğv olunması prosesi sadələşdiriləcək. Millət vəkili hesab edir ki, nəzarət mexanizmləri gücləndirildikcə, onların işindəki qüsurlar da azalacaq. Ancaq bu günlərdə özəl klinikada həkimlərin nişanlı qızın başına gətirdikləri bədbəxt hadisənin doğurduğu suallar hələ də cavabsız qalır.

Axar.az-ın yaydığı xəbərə görə, toyuna hazırlaşdığı bir vaxtda estetik əməliyyat etdirən xanım həkimlərin səriştəsizliyinin qurbanı olub. Adətən, vətəndaşlar çox pul müqabilində az bilik və bacarıq nümayiş etdirən yerli həkimlərə güvənmirlər. Ona görə müalicə üçün ya xarici ölkələrə gedir, ya da xaricdən özəl klinikalara təşrif buyuran həkimlərə üstünlük verirlər. 27 yaşlı xanımın başına gətirilən olayla artıq həmin həkimlərə və klinikalara olan azaçıq inamı da məhv etdilər.

Heç yerdə izi qoymayan "həkim"

Hadisə isə ötən il aprelin 7-də İstanbul Estetik Klinikasında baş verib. Türkiyədən gələn həkim Zubeir Orter xanımı müayinə edən kimi dərhal əməliyyata götürüb və səhərisi geri qayıdıb. Uğursuz əməliyyatdan sonra yoxa çıxan həkimi hələ də tapa bilməyiblər. Klinikanın baş həkimi isə gənc qızın səhhətinə dəyən ciddi zərbənin müqabilində yalnızca üzr istəməklə kifayətlənib.

Yeri gəlmişkən, həkim Zubeir Orteri hamımıza bəlli olan sosial şəbəkələrdə, ən geniş axtarış sistemi olan Quqlda tapmağa çalışdıq. Lakin cəhdlərimiz baş tutmadı. İnsanların savadına və bacarığına güvənib taleyini etibar etdiyi həkimin heç yerdə izi belə yoxdur. Zavallı müştəriləri də həkimin onlara verilən telefonlara cavab vermədiyini deyir.

Ona görə də olay özəl kilinikaların fəaliyyətinə və oraya xaricdən gətirilən həkimlərin işinə nəzarət məsələsini aktuallaşdırdı. Haqlı suallar ortaya çıxdı: Həmin klinikaların xaricdən həkim dəvət etməsi hansı qaydada tənzimlənir? Xaricdən gələn həkimlərin işinə nəzarət varmı və necə qurulub? Uğursuz əməliyyatlara görə kim məsuliyyət daşıyır?

İstəyəndə yasaqlar işə düşür

Türkiyədən dəvət olunan həkim-cərrah Hamdi Koçər Bakıda bir neçə özəl klinikada xərçəng xəstəliyindən əziyyət çəkən insanlara yardım edirdi. Onun müalicəsindən razı qalan xəstələr Milli Onkologiya Mərkəzinə getməkdən imtina edirdilər. Xeyli müddət Azərbaycana gəlib-gedən, insanlara şəfa bəxş etdiyi iddia edilən (hər halda bunu həkimin müalicə etdiyi insanlar deyir) həkim daha ölkəyə buraxılmır. Səbəbi kimi yerli həkimlərin qısqanclığı və onun barəsində yalan informasiya ilə yanlış rəy formalaşdırmasını göstərirlər.

Bizi isə maraqlandıran başqa şeydir: yasaq imkanı varsa, demək, insanların sağlamlığına, gələcək həyatına ciddi zərbə vuran Zubeir Orter kimi fırıldaqçı "həkimə" də asanlıqla qadağa qoymaq, hətta məsuliyyətə çəlb etmək mümkündür. Səhiyyə Nazirliyi səy göstərsə, həmin adamı beynəlxalq axtarışa verərək məsuliyyətdən yayınmasını da əngəlləyə bilər.

"Stomatologiya üzrə lisenziya alıb, amma..."

Yeri gəlmişkən, gənc qızın başına gələn bədbəxt hadisədə İstanbul Klinikasının məsuliyyəti danılmazdır. Özəl klinikalara hər hansı sahə üzrə fəaliyyət göstərməsinə icazə verildiyi halda onlar lisenziyada nəzərdə tutulmayan xidmətləri də təklif edirlər və nəticədə bədbəxt hadisələr baş verir. Bu məsələni millət vəkili H.Rəcəbli də dilə gətirib:

"Bir də görürsən ki, stomatologiya üzrə lisenziya alıb, amma abortla məşğuldur. Ona görə də bir müddət əvvəl Azərbaycanda özəl müəssisələrdə tibbi xidmətin tənzimlənməsi, onlara lisenziyaların verilməsi ilə bağlı bəzi addımlar atıldı, bu qaydaların pozulmasına görə cərimələr 8 min manatadək artırıldı. Amma bəzən qanunları pozan özəl tibb müəssisələrinin lisenziyalarının ləğv olunmasında müəyyən problemlər yaranır".

H.Rəcəbli qeyd edib ki, eyni zamanda xaricdən Azərbaycana gələn həkimlərə də ciddi nəzarət olunur.

Mövzunu davam etdirəcəyik.