COVİD-19 virusu aşkarlananda insanlar arasında virusun olmadığı haqqında fikirlər yarandı. Lakin hər kəs ailəsində, yaxınında bu xəstəliyə yoluxan gördükdən sonra fikirlərini dəyişdi. Bu gün isə sosial şəbəkələrdə vaksin haqqında ziddiyyətli fikirlər səsləndirirlər.

Axar.az xəbər verir ki, bunu Vəli Axundov adına Elmi Tədqiqat Tibbi Profilaktika İnstitutunun direktoru, professor Adil Allahverdiyev Nazirlər Kabineti yanında Operativ Qərargahın bu gün keçirilən brifinqində deyib.

Onun sözlərinə görə, virusdan qorunmaq üçün vaksinasiya ən doğru yoldur:

"Biz vaksin sayəsində yayılan epidemiyanın qarşısını ala bilərik. Vaksin virusun üzərindəki RNT bölgəsini zərərsizləşdirir. Hansı yolla əldə edilməsindən asılı olmayaraq, vaksinin tək məqsədi immunitet sistemini gücləndirməkdir. Bu baxımdan Çində istehsal olunan "Sinovak" vaksini üzərində aparılan tədqiqatlar müsbət nəticələr verməkdədir. Ölkəmizin bu sahədə çox gözəl təcrübələri var. Vaksinin faydasına inanmaq lazımdır".