Azərbaycanda vərəmə yoluxma və xəstələnmə səviyyəsi son illər ərzində xeyli azalıb.

Bu barədə Axar.az-a Səhiyyə Nazirliyinin mətbuat xidmətindən məlumat veriblər.

Məlumata görə, ölkədə həyata keçirilən profilaktik tədbirlər nəticəsində, son statistik məlumatlara əsasən, son illər ölkədə vərəmlə xəstələnmə səviyyəsinin azalması müşahidə edilir. Həmçinin, müalicə effektivliyinin yüksəlməsi, xəstə kontingentin əhəmiyyətli dərəcədə azalması tendensiyası qeydə alınıb.

Son illərdə dünya üzrə vərəm epidemiyasının sabitləşməsi meylləri müşahidə edilməkdədir. Bu əsasən Yer kürəsinin iqtisadi artım qeyd olunduğu və yoxsulluqla mübarizədə uğurlar əldə edildiyi regionlara aiddir.

Nazirlikdən bildiriblər ki, ölkədə vərəmli xəstələr dövlət hesabına tam pulsuz müalicə alırlar. Vərəmli xəstələrin dərmanla təchizatını 2010-cu ildən dövlət öz üzərinə götürüb. 2013-cü ildən etibarən dərmana davamlı vərəmli xəstələrin də müalicəsi üçün lazım olan dərman preparatları da dövlət tərəfindən təchiz olunur.

Respublikada Vərəm əleyhinə xidmət paytaxtda və respublikanın bütün rayonlarında yerləşən 68 ixtisaslaşdırılmış müəssisə tərəfindən həyata keçirilir.

Xatırladaq ki, hazırda ölkədə 1 İnstitut, 7 dispanser, 18 xəstəxana, 11 vərəm əleyhinə şöbə, 31 vərəm əleyhinə kabinet fəaliyyət göstərir. Hazırda respublikada vərəm xəstəliyi ilə mübarizə aparan geniş vərəm əleyhinə tibb müəssisələri şəbəkəsi də mövcuddur. Elmi-tədqiqat Ağciyər Xəstəlikləri İnstitutunda Milli İstinad Laboratoriyası tikilərək istifadəyə verilib. Son 7 ildə də vərəmin dərmana davamlı formalarının müalicəsinə başlanılıb.

Qeyd edək ki, vərəm – əsasən hava-damcı yolu ilə ötürülən infeksion xəstəlikdir. Ümümdünya Səhiyyə Təşkilatının statistik məlumatına əsasən, dünyada il ərzində 9.000.000-dan artıq insan bu xəstəliklə xəstələnir və 1.800.000 insan bu xəstəlikdən vəfat edir.