Azərbaycan Dillər Universitetinin rektoru, akademik Kamal Abdullanın “Azərbaycanca danışaq” seriyasından növbəti kitabı Polşada nəşr olunub.

Bu barədə Axar.az-a universitetdən məlumat verilib.

Məlumata görə, Azərbaycan dilinin, tarixinin və mədəniyyətinin təbliği ilə bağlı geniş fəaliyyət proqramının tərkib hissəsi olan kitab Varşava Universitetinin professoru Danuta Çmelovskayanın tərcüməsində işıq üzü görüb.

Kitaba praktiki səciyyəli zəngin dil materialı, danışıq kitabçası ilə yanaşı ölkəmizin coğrafi mövqeyi, mədəniyyəti, tarixi haqqında informativ bilgilər də daxil edilib.

Nəşr Polşanın ən böyük və nüfuzlu nəşriyyat evlərindən biri olan "Wydawnictwo Adam Marszałek" tərəfindən çap olunub.

Kitabın əsas məqsədi Polşa və geniş Avropa regionunda Azərbaycanın zəngin tarixi keçmişi, dil strukturu, multikultural dəyərləri barədə mövcud elmi bilikləri yeniləmək və genişləndirməkdir.

Kitabda Azərbaycanın qədim dövrlərindən bu günə qədər keçdiyi tarixi inkişaf yolu fəsillər üzrə təhlil edilir, Azərbaycan dilinin digər türk dilləri arasındakı spesifik qrammatik mövqeyi izah olunur. Kitabda eyni zamanda rəsmi Bakının Avropa İttifaqı çərçivəsində, xüsusən də “Şərq Tərəfdaşlığı” proqramı çərçivəsindəki siyasi-iqtisadi rolu və ölkənin Şərqlə Qərb arasında geosiyasi körpü xüsusiyyətləri ətraflı şəkildə işıqlandırılır. Nəşrin özəlliklərindən biri də, əsrlər boyu formalaşmış Polşa-Azərbaycan tarixi münasibətlərinə, Bakının memarlığında və sənayesində böyük iz qoymuş polşalı mühəndis və sənətkarların fəaliyyətinə xüsusi bir bölmənin həsr edilməsidir.

Kitab Polşanın aparıcı universitetlərinin şərqşünaslıq fakültələrində elmi vəsait kimi istifadə olunmaqla yanaşı, regionla maraqlanan səyyahlar üçün də ən etibarlı qaynaqlardan biridir. Oxucular nəşr, rəylər və qiymətlərlə bağlı əlavə məlumatı Polşanın populyar ədəbiyyat platforması olan “Lubimyczytac” portalı vasitəsilə əldə edə bilərlər.

Qeyd edək ki, Xalq yazıçısı Kamal Abdullanın “Azərbaycanca danışaq” kitabı indiyədək Fransa, Macarıstan, Rumıniya, Serbiya, Birləşmiş Ərəb Əmirliyi və Pakistanda nəşr olunub.