“Arxadan vurulan zərbə” filmində çətin səhnələr var idi. Döyüş, atla, Qurd Cəbrayılla səhnələr... Müxtəlif məkanlarda çəkdik bu filmi. Qaxda, Zaqatalada, Mingəçevirdə, Qubada.

Axar.az xəbər verir ki, bu sözləri ARB TV-nin “Ömrün fəsilləri” verilişinin qonağı olan xalq artisti Rafiq Əzimov deyib. Aktyor “Arxadan vurulan zərbə” filminin çəkilişi zamanı başına gələn təhlükəli hadisədən söz açıb:

“Çəkilişlər Zaqatalada gedirdi. Sirkdən bıçaq atan gətirmişdilər. 10 metr uzaqdan ağaca bıçağı düz atırdı. Bir dənə boş bıçaq atmırdı. Məşqdə mənə göstəriş verildi və mən hərəkət etdim. İkinci göstəriş bıçaq atana verildi, 3-cü göstəriş yenidən mənə verildi ki, əyilim. Bir dubl çəkildi və mən əyildim. Sonra Arif mənə dedi ki, Əzimov gəl bir də çəkək. İkinci dublda göstəriş mənə gec verildi. Artıq mən qalxanda bıçaq gəldi başımın üstündə şlyapanı tərpətdi. Elə bildim ki, küləkdir. Heç nə hiss etmədim. Ancaq texniki işçilər heyrətlə birdən qalxıb, gəlib mənim başıma baxdılar. Onda məni vahimə basdı. Arif (filmin rejissoru Arif Babayev nəzərdə tutulur – red.) dedi ki, anan namaz üstündəymiş”.

Qeyd edək ki, “Arxadan vurulan zərbə” filmi 1977-ci ildə lentə alınıb. Film Əhməd Qəmərlinin (Həsən Məmmədov) müəmmalı şəraitdə qətlə yetirilməsi haqqındadır. Respublika cinayət axtarışı idarəsinin müstəntiqi Gündüz Kərimbəyli (Şahmar Ələkbərov) cinayətkarı tapmaq üçün uzun axtarışlar aparmalı olur.