Azərbaycanda erməni ordusunda tüğyan edən özbaşınalıqdan bəhs edən animasiya hazırlanıb.

Kult.az xəbər verir ki, həvəskar gənclər Ermənistan-Azərbaycan, Dağlıq Qarabağ münaqişəsi barədə “Özgə saatı” adlı animasiya çarxı hazırlayıblar. Çarxda cəbhənin təmas xəttində Ermənistan Silahlı Qüvvələrinin mütəmadi olaraq yaratdıqları təxribatlar, erməni ordusundakı özbaşınalıq və ölüm halları, erməni məmurlarının münaqişədən necə faydalanmaları, öz oğlanlarının özgə torpaqda ölmələrinə etiraz edən erməni analarının aksiyaları və ermənilərin Ermənistandan miqrasiya etmələri əks olunub.

Videoçarxda zəbt edilmiş ərazilərdə yerləşən Azərbaycana məxsus tarixi abidələrin 3D qrafikalı animasiyaları yer alıb. 3D animasiyada həmçinin ermənilərin cəbhənin təmas xəttində törətdikləri təxribatların qarşısını almaq məqsədilə Azərbaycan Silahlı Qüvvələri tərəfindən erməni hərbi helikopterinin və zenit-raket kompleksinin məhv edilməsi kadrları da yığılıb.

Gənclərin məqsədi Ermənistan-Azərbaycan münaqişəsi barədə həqiqətləri dünya ictimaiyyətinə çatdırmaqdır.

Qeyd edək ki, videoçarx Prezident yanında QHT-lərə Dövlət Dəstəyi Şurasının yardımı ilə “Addım” GİM İctimai Birliyinin həyata keçirdiyi “Ermənistan-Azərbaycan Sülh Platforması 3D qrafikalı animasiyada” layihəsi çərçivəsində hazırlanıb.