Ermənistan xarici işlər naziri Ararat Mirzoyanın həyat yoldaşı Qoar Abacyan Azərbaycanla kommunikasiyaların bərpası üzrə yaradılan komissiyanın üzvləri sırasına daxil edilib.

Axar.az Globalinfo.az-a istinadən xəbər verir ki, bununla bağlı qərarı Ermənistanın Baş naziri Nikol Paşinyan imzalayıb.

Qərara əsasən, Azərbaycan və Ermənistan arasında nəqliyyat və iqtisadi əlaqələrin bərpası ilə bağlı komissiyanın tərkibi yenilənib. Baş nazirin müavini Mger Qriqoryanın rəhbərlik etdiyi komissiyada xarici işlər nazirinin müavini Vaan Kostanyan, xarici işlər nazirinin həyat yoldaşı Qoar Abacyan və digər dövlət rəsmiləri yer alıblar.

Qeyd edək ki, Qoar Abacyan yaxın günlərdə İnvestisiyaların Təşviqi Mərkəzi Fondunun direktoru təyin olunub. Komissiyanın yeni tərkibində həmçinin Ermənistanın beynəlxalq hüquqi məsələlər üzrə nümayəndəsi, Ali Məhkəmə Şurasının keçmiş sədri Karen Andreasyan da yer alıb.