Ana səhifə Siyasət |
Osmanlı dövrünü də nəzərə alsaq, türklər 14-cü əsrdən etibarən Avropa siyasətini əsas formalaşdıran xalqlardandır. Bu mənada deyə bilərik ki, Türkiyə Qərb ailəsinin bir üzvüdür. Qərb bunu nə qədər inkar etsə də, bu belədir. Bu mənada Avropa heç bir zaman Türkiyəni bu ailədən kənarlaşdıra bilməz.
Bu sözləri Axar.az-a siyasi ekspert Vüqar Zifəroğlu Türkiyə Prezidenti Rəcəb Tayyib Ərdoğanla Fransa Prezidenti Emmanuel Makron arasında baş tutan telefon danışığını şərh edərkən deyib. O bildirib ki, Fransa istəsə də, istəməsə də Avropa hegemonluğu uğrunda Türkiyə ilə qarşı-qarşıya gəlməlidir:
“Tərəflər Türkiyə-Fransa və Türkiyə-AB ölkələri arasında əlaqələr, eləcə də Aralıq dənizinin şərqində baş verən son hadisələr başda olmaqla, bölgədəki məsələləri müzakirə edib. Düzdür, bu zəng “gözlənilməz” kimi təqdim edilir, ancaq belə bir danışığın olması gözlənilən idi.
Çünki Türkiyə çox ciddi geosiyasi və geoiqtisadi məkanda yerləşir. Mahiyyət etibarilə rəsmi Ankara Qərb üçün əhəmiyyətli bir ölkədir. Türkiyə Qərbin Yaxın Şərqə, postsovet məkanına, Şimali Afrikaya açılan qapısı hesab edilir. Digər tərəfdən, regionda güc balansının qorunub saxlanmasında Türkiyə açar ölkədir. Xüsusən Yaxın Şərq məsələlərində Türkiyənin varlığı Qərbin maraqlarına uyğundur. Bu mənada əgər Fransa Qərb ölkələri içərisində əsas aparıcı ölkə olmaq istəyirsə, Türkiyə ilə uzlaşmalıdır”.
Tarix
2020.09.23 / 12:58
|
Müəllif
Turan Rzayev
|