Əliyev Zəngilana səfərində bildirdi: “Zəngəzur dəhlizinin açılması ilə bağlı son hadisələr onu göstərir ki, istədiyimizə nail oluruq”.

Soçi görüşünün gündəmi, Paşinyanın Moskvaya dəvət edilməsi, ardınca MDB iclasında Naxçıvanla nəqliyyat əlaqəsinə razı olduqları açıqlamaları və s. prosesin aktivləşdiyini deməyə əsas verir.

Azərbaycan öz sərhədlərinə düşən hissədə - Zəngilana qədər olan ərazidə işləri həyata keçirir: işlərin 2024-cü ildə başa çatdırılması planlaşdırılır. Lakin dəhlizin Ermənistan ərazisindən keçən hissəsində inşa işlərinin nə vaxt başlanacağı sualı hələ də açıq qalır.

Bu ilin aprelində Türkiyənin nəqliyyat və infrastruktur naziri Adil Qaraismayıloğlu Naxçıvanı Azərbaycana birləşdirəcək avtomobil yolunun tikintisinin getdiyi, işin ilin sonunda – dekabrda yekunlaşacağı, ardınca dəmir yolunun inşasına başlanacağına dair açıqlama vermişdi. Hərçənd, Ermənistan ərazisinə düşən hissədə hansısa inşa işlərinin getdiyinə dair məlumat yoxdur.

Bakının cari hədəfi dəhlizin Ermənistan ərazisindən inşasına başlamaqdır və istisna deyil ki, Əliyevin istinad etdiyi “son hadisələrdə” – təmaslarda tikinti işlərinə başlamaqla bağlı razılıq əldə olunub.