Avropanın psevdo-liberal, qlobolist, dəyərlərsiz və onurğasız elitası ABŞ-ın Demokratlar Partiyasının hələ də işlək olan resurları ilə birlikdə Avropada “sağlam düşüncə, sağlam məntiq” siyasətinə qarşı “səlib yürüşü” elan edib.

Axar.az xəbər verir ki, bu barədə siyasətçi Natiq Cəfərli qeyd edib.

O bildirib ki, Avropanın indiki siyasi elitası Rusiyadan çəkinib eləmir, Kreml bəhanədir, əslində Putin də o dəstədəndir, dəyərləri olmayan, maraqları öndə gedən Avropa ilə ən çox elə o anlaşırdı:

“İndi onların ən çox qorxduğu məsələ ideoloji olaraq uduzmaqları, cərəyan olaraq “trampizm”in Avropaya yayılmasıdır. Avropada özlərinə təhlükə gördükləri hər bir lideri, onların “xoruna” qoşulmayan siyasi partiya və siyasətçiləri “düşmən” elan edib, “trampizm”in qarşısını kəsməyə çalışırlar. Tramp - şəxs deyil, funksiyadır, dünyada yeni (əslində ənənəvi) ideoloji cərəyanın təmsilçisidir, arxasında ciddi bir güc var.

Avropa bundan qorxur, düşünür ki, birtəhər 4 ili yola verib, dirənib, əsl SSRİ kimi davranaraq, ideoloji rəqiblərini siyasi olaraq məhv etməklə ayaqda qalmaq lazımdır.

Amma yanılırlar, psevdo-sol, psevdo-liberalizm insanlıq əleyhinədir, bunu anlayıb əsl diskurs açıb, yeni tezislər yarada bilməsələr, əsl kommunist kimi davranıb bəyənmədiklərini qaralamaqdan vaz keçməsələr, uduzacaqlar.

Dəyişsələr, məntiqə, əsl söz və ifadə azadlığına geri dönsələr, yaxşı olar - o zaman “trampizm” də cızığından çıxmaz, təhlükəli hal almaz”.

Ekspert bir daha xatırladıb ki, 1990-cı ildən bəri dünyada ilk dəfədir ki, siyasi cəbhələşmə ideoloji müstəviyə keçir:

“Bu, çox yaxşıdır, amma təhlükələri də var. Avropa özünə geri dönməsə, əsl liberalizmə doğru hərəkət etməsə, “trampizm” təhlükəli hala qədər böyüyə bilər. Hələ ki, qoca qitə SSRİ kimi davranır, ümid edirəm ki, aqibəti SSRİ kimi olmaz...”