Son günlərdə hantavirusla bağlı xəbərlər dünyada diqqət çəkir. Xüsusilə xəstəliyin ağır gedişi və ölüm riski barədə xəbərlər narahatlıq yaradıb. Argentinadan Kabo-Verdeyə gedən 150-dən çox sərnişinin və 61 ekipaj üzvünün olduğu Niderlanda məxsus "MV Hondius" kruiz laynerində hantavirusla bağlı yoluxma halları qeydə alınıb. İndiyədək azı səkkiz yoluxma və üç ölüm faktı təsdiqlənib.

Bəs Azərbaycanda risk varmı?

Axar.az Xəzər TV-yə istinadla xəbər verir ki, hazırda bu virusun yayılma və ikinci COVID-19-a çevrilmə ehtimalı dünya mediasında müzakirə edilən əsas mövzulardan birinə çevrilib.

İnfeksionistlərin sözlərinə görə, hantavirus insanlar və heyvanlar üçün təhlükə yaradan patogendir. Əsasən, gəmiricilərdən yoluxur:

"Hantavirusa yoluxmuş gəmiricilərin ifrazatları nəticəsində ətrafa yayılır. Xüsusilə təmasdan bir və səkkiz həftə ərzində ilkin kliniki əlamətlər müşahidə edilə bilər. İlkin kliniki əlamətlər isə qripəbənzər əlamətlərlə özünü göstərir.

Yüksək hərarət, halsızlıq, əzginlik, əzələ ağrıları, başağrıları kimi əlamətlər özünü göstərir. Xəstəlik, əsasən, bədən temperaturunun yüksəlməsi, güclü başağrıları, iştahasızlıq, ürəkbulanma, qusma, sümük-əzələ ağrıları ilə müşahidə olunur.

Əsasən, iki forması var: hemorragik sindromlu böyrək forması və pulmonar sindrom dediyimiz ağciyər forması.

Bu iki formadan biri inkişaf edir və təəssüf ki, letallığı yüksəkdir.

Bu xəstəlik koronavirusda olduğu kimi pandemiya törətmək potensialına malik deyil. Çünki bu xəstəlik koronavirusda olduğu kimi hava-damcı yolu ilə insandan-insana yoluxmur".

Səhiyyə Nazirliyindən bildirilib ki, hazırda Azərbaycan ərazisində hantavirus infeksiyasına şübhəli və ya təsdiqlənmiş yoluxma halları qeydə alınmayıb:

"Bu virus ölkəmiz üçün endemik hesab olunmur və mövcud epidemioloji vəziyyət virusun yayılma riskinin aşağı olduğunu göstərir. Hantavirus, əsasən, siçan və digər gəmiricilər vasitəsilə yoluxa bilər. Bu səbəbdən risk daha çox gəmiricilərlə sıx təmas olan yerlərdə mövcuddur. Profilaktik məqsədlə gigiyena qaydalarına əməl etmək, gəmiricilərə qarşı mübarizə aparmaq və köhnə məkanlarda təmizlik zamanı qoruyucu vasitələrdən istifadə etmək tövsiyə olunur".

Nazirlikdən qeyd olunub ki, hazırda vəziyyət əhali üçün narahatlıq doğurmur və epidemioloji durum müvafiq qurumlar tərəfindən daim nəzarətdə saxlanılır.