Rusiya tarix boyu Qafqazı hərbi istehkam kimi qiymətləndirib, bölgədə hökmranlığını möhkəmləndirmək üçün yerli xalqları parçalamaq və qarşı-qarşıya qoymaq siyasəti aparıb.

Axar.az Teleqraf-a istinadla xəbər verir ki, bunu Türkiyənin Ege Universitetinin Türk Dünyası Araşdırmaları İnstitutunun Türk Tarixi kafedrasının müdiri, professor Abdullah Temizkan “Mədəni və etnik müxtəliflik: tarixin dərsləri, müasir çağırışlar” adlı keçirilən beynəlxalq konfransda deyib.

Professor bildirib ki, Rusiya tarixən Qafqaz coğrafiyasına hərbi istehkam kimi yanaşıb, burada möhkəmlənməyə, yerli xalqları özünə tabe etdirməyə çalışıb:

“Bu məqsədlə bölgə xalqlarını parçalamağa, bir-birinə qarşı qoymağa və təcrid etməyə yönəlmiş siyasət həyata keçirilib”.

A.Temizkan vurğulayıb ki, Qafqaz xalqları bütün təzyiqlərə baxmayaraq azadlıq ruhunu qoruyub saxlayıb:

“Azadlıq yalnız döyüş meydanlarında deyil, milli mədəniyyətin, tarixi yaddaşın və mənəvi məkanın qorunması ilə yaşadılır”.