Hazırda ABŞ-da yaşayan tanınmış azərbaycanlı aparıcı və aktrisa Tunay Əliyeva həftə sonları restoranda yuxa bişirir.

Axar.az Bizim.Media-ya istinadla xəbər verir ki, o bu barədə sosial şəbəkə hesabında məlumat verib.

“Amerikada 6 ilim tamam oldu. Amma bu 6 ildə səhhətimlə bağlı o qədər əziyyətlər çəkdim ki, nə siz soruşun, nə də mən danışım… O dəhşətli günləri xatırlamaq belə istəmirəm. Buna baxmayaraq, o ağır xəstəliklərlə mübarizə apara-apara işləməli idim. Elə buna görə də bu 6 ildən sonra hələ də maddi baxımdan demək olar ki, eyni nöqtədəyəm.

Amma bu gün sağlamam, güclüyəm, ümidlə doluyam. Və çox xoşbəxtəm.

Həftə sonları restoranda işləyirəm və bu fiziki əmək sanki mənə böyük bir həyat məktəbi keçir.

Mənim üçün azad və müstəqil olmaq heç vaxt məsuliyyətsizlik demək olmayıb. Əksinə, azadlıq öz zəhmətinlə yaşamaq, heç kimə yük olmamaq, alın təri ilə qazandığın çörəyi qazanmaq və həyatının məsuliyyətini öz üzərinə götürməkdir.

Əziz gənclər, unutmayın: heç bir halal əmək insanı kiçiltmir”, - deyə T.Əliyeva bildirib.

Xatırladaq ki, Tunay Əliyeva uzun illər Azərbaycanda müxtəlif televiziya kanallarında çalışıb. Bundan əlavə o, aktyorluq fəaliyyəti ilə də məşğul olub.