Prezident İlham Əliyev “Rəqabətin inkişafına və inhisarçılıq fəaliyyətinin qarşısının alınmasına dair 2027‒2029-cu illər üzrə Milli Fəaliyyət Planı”nın təsdiq edilməsi haqqında sərəncam imzalayıb.

Axar.az sərəncamın mətnini təqdim edir:

1. “Rəqabətin inkişafına və inhisarçılıq fəaliyyətinin qarşısının alınmasına dair 2027‒2029-cu illər üzrə Milli Fəaliyyət Planı” (bundan sonra – Milli Fəaliyyət Planı) təsdiq edilsin (əlavə olunur).

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

3. Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi:

3.1. Milli Fəaliyyət Planında nəzərdə tutulmuş tədbirlərin icrasını əlaqələndirsin;

3.2. Milli Fəaliyyət Planında nəzərdə tutulmuş tədbirlərin icra vəziyyəti barədə ildə bir dəfə Azərbaycan Respublikasının Prezidentinə məlumat versin.

4. Milli Fəaliyyət Planında nəzərdə tutulmuş tədbirlərin icrasının monitorinqini və qiymətləndirilməsini Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin sifarişi əsasında İqtisadi İslahatların Təhlili və Kommunikasiya Mərkəzi həyata keçirsin.

***

Prezident İlham Əliyev Azərbaycan Respublikası Prezidentinin 2026-cı il 22 iyul tarixli 731 nömrəli Fərmanı ilə təsdiq edilmiş “Beynəlxalq Münasibətlərin Təhlili və Multikulturalizm Mərkəzi” publik hüquqi şəxsin Nizamnaməsi”ndə dəyişiklik edilməsi haqqında fərman imzalayıb.

Fərmanda deyilir:

1. Azərbaycan Respublikası Prezidentinin 2026-cı il 22 iyul tarixli 731 nömrəli Fərmanı ilə təsdiq edilmiş “Beynəlxalq Münasibətlərin Təhlili və Multikulturalizm Mərkəzi” publik hüquqi şəxsin Nizamnaməsi”ndə aşağıdakı dəyişikliklər edilsin:

1.1 . 1.1-ci bənddə “və mədəni, dini,” sözləri “etnik, dini, mədəni, o cümlədən” sözləri ilə əvəz edilsin;

1.2 . 3-cü hissə üzrə:

1.2.1. aşağıdakı məzmunda 3.1.3-1-ci yarımbənd əlavə edilsin:

“3.1.3-1. ölkədə, regionda və dünyada baş verən etnosiyasi və dini proseslərlə bağlı analitik-informasiya materialları və fəaliyyət proqramları hazırlamaq;”;

1.2.2. 3.1.6-cı yarımbənddə “mədəni, dini və” sözləri “etnik, dini, mədəni, o cümlədən” sözləri ilə əvəz edilsin;

1.2.3. 3.1.10-cu yarımbənddə “mədəni, dini müxtəlifliyin tolerant” sözləri “etnik, dini, mədəni, o cümlədən linqvistik müxtəlifliyin və tolerantlığın” sözləri ilə əvəz edilsin;

1.2.4. 3.1.11-ci, 3.1.12-ci və 3.1.14-cü yarımbəndlər ləğv edilsin;

1.2.5. 3.1.16-cı yarımbənddə “bölməsinə” sözü “bölmələrinə” sözü ilə əvəz edilsin;

1.3. 4.3-cü bənddə “3 (üç)” sözləri “4 (dörd)” sözləri ilə, “2 (iki)” sözləri “3 (üç)” sözləri ilə əvəz edilsin.

2. Azərbaycan Respublikasının Nazirlər Kabineti bu Fərmandan irəli gələn məsələləri həll etsin.