Dəm qazından zəhərlənmə hallarının artmasında əsas məsuliyyət vətəndaşların üzərinə düşür, əhali qaz cihazlarından düzgün istifadə etmir.

Bu sözləri Azad İstehlakçılar Birliyinin eksperti Nüsrət Qasımov Axar.az-a dəm qazından zəhərlənmə halları ilə bağlı danışarkən bildirib. Mütəxəssisin sözlərinə görə, vətəndaşlar adətən isti olsun deyə, sobanın yandığı otaqları tam qapalı vəziyyətdə saxlayırlar. Nəticədə sobadan çıxan zərərli maddələr dar və qapalı otaqda toplanır, nəticədə isə zəhərlənmə baş verir:

"Vətəndaşlar bilməlidirlər ki, qaz sobalarının borusu yalnız dəmirdən hazırlanmalı və onun bayıra çıxışı olmalıdır. Vanna otağında nəfəslik, ventilyasiya kanalı olmalıdır. Qapı bayır tərəfə açılmalı və qapının aşağısında hava daxil olması üçün dəliklər qoyulmalıdır. Bundan başqa, otağın havası tez-tez dəyişməli, bacalar il ərzində təmizlənməlidir. Bəzən yaz-yay mövsümündə quşlar həmin bacalarda yuva qurur və beləliklə, bacanın ağzı qapanır. Belə şəraitdə yanma məhsulu otağa daxil olur və karbon qazı insanları boğur".

Ekspert bildirir ki, qanunla bu işləri çoxmərtəbəli yaşayış binalarında Mənzil İstismar Sahələri görməli, qışa hazırlıq tədbirləri çərçivəsində tüstü borularını və şaxtaları, evlərə gələn qaz xətlərini texniki yoxlanışdan keçirməli və onun qeydiyyatını aparmalıdır. Fərdi həyət evlərində isə vətəndaşlar özləri vaxtı-vaxtında istifadə qanunlarına riayət etməlidirlər.

N.Qasımov həmçinin qeyd edir ki, qaz sobalarını mütləq bu işə bələd olan ustalar quraşdırmalıdır. Kustar üsulla hazırlanan qaz cihazları da faciəli nəticələrə gətirib çıxarır:

"Bir sözlə, faciədən qaçmaq üçün qazla ehtiyatlı davranmaq yalnız vətəndaşın öz tədbirliliyi və ehtiyatı sayəsində mümkündür. Necə deyərlər, öz qayğısına qalanın Allah da qayğısına qalar".