Qida Təhlükəsizliyi Agentliyinin (AQTA) sədri Qoşqar Təhməzli bu gün ət və ət məhsullarının istehsalı ilə məşğul olan AzProtein Fuds Qrup MMC-nin fəaliyyəti ilə tanış olub, istehsalat sahələrinə baxış keçirib.

Axar.az xəbər verir ki, agentlik sədri qida təhlükəsizliyi sahəsində dövlət siyasəti və qarşıya qoyulan tələblər haqqında danışıb. O, müasir standartlara cavab verən, qida zəncirində mühüm əhəmiyyət kəsb edən ət və ət məhsullarının istehsalı, tədarükü, qablaşdırılması və satışının əsas vəzifə olduğunu diqqətə çatdırıb.

Müəssisədəki iri və xırdabuynuzlu heyvanların kəsim sahəsi, laboratoriya otağı, dondurucu sahə, qablaşdırma sahəsinə baxış keçirən Q.Təhməzli iş prosesini müşahidə edib, kollektivi maraqlandıran bir sıra məsələlərə aydınlıq gətirib, onların istək və arzularını dinləyib.