Goranboy rayonunda şəhid ailəsi ilə icra hakimiyyətinin nümayəndələri arasında gərginlik yaşanıb.

Bu barədə Axar.az-a rayon sakinləri məlumat veriblər. Onların sözlərinə görə, icra hakimiyyətinin nümayəndələri ilə bir şəhid ailəsi arasında mübahisə Əmək və Əhalinin Sosial Müdafiəsi Nazirliyinin sifarişi ilə müharibə əlilləri və şəhid ailələrinə tikilmiş mənzillərin təqdim edilməsi zamanı baş verib.

Mübahisəyə səbəb isə mənzilə ehtiyacı olan şəhid ailəsinin bölgüdən kənarda qalması olub. Mənzillər paylanan zaman ümumiyyətlə ailəsində şəhid olmayan vətəndaşa ev verildiyi halda, ağır vəziyyətdə olan, iki şəhid vermiş bir ailə növbədən çıxarılıb. Belə ki, Goranboy rayonunun Tap Qaraqoyunlu kəndində yaşayan şəhid ailəsi Dursun xanım əlil oğlu ilə birlikdə illərdir ev növbəsinə durub. Ailə başçısı Musa kişini Qarabağ müharibəsində itirən ailəyə icra hakimiyyətindən mənzillə təmin ediləcəyi deyilib. Lakin mənzillər ailələrə verildiyi gün siyahıdan sözügedən ailənin adı çıxmayıb. Bu da ailə ilə icra hakimiyyətinin nümayəndələri arasında böyük mübahisəyə səbəb olub.

Məsələ ilə bağlı Goranboy Rayon İcra Hakimiyyəti ilə əlaqə saxladıq. İcra nümayəndəliyinin müharibə iştirakçıları və şəhid ailələrinə ev verilməsi tədbirində iştirak edən Eldəniz adlı əməkdaşı hadisədən xəbərsiz olduğunu bildirdi:

"Tədbirdə mən də iştirak etmişəm. Lakin tədbirin sonuna qədər orada qala bilmədiyim üçün sonda nə baş verdiyini bilmirəm. Ancaq şəhid ailələri ilə icra nümayəndələri arasında hansısa mübahisənin baş verdiyinin şahidi olmamışam. Ümumiyyətlə belə bir hadisədan xəbərim yoxdur".

Əmək və Əhalinin Sosial Müdafiəsi Nazirliyinin mətbuat xidmətinin rəhbəri Elman Babayev də Axar.az-a açıqlamasında məsələ ilə bağlı məlumatının olmadığını bildirdi:

"Sözügedən tədbirdə mən də iştirak etmişəm, lakin elə bir mübahisənin şahidi olmamışam. Mənzillərin kimlərə verilməsini şəhər və rayon icra hakimiyyətləri tətbiq edir və bu, onların səlahiyyətindədir. Ümumiyyətlə, Əmək və Əhalinin Sosial Müdafiəsi Nazirliyinin siyahıya alma səlahiyyəti yoxdur. Bu siyahını şəhər və rayon icra hakimiyyətləri özləri müəyyən edir və nazirliyə təqdim edirlər".

E.Babayevin sözlərinə görə, adı mənzil siyahısında olanlar zamanla mənzillərlə təmin edilir. Şəffaflığın təmin edilməsi üçün isə həmin siyahılar nazirliyin rəsmi saytına da yerləşdirilir:

"Kimsə adının siyahıda olub-olmadığını saytda yerləşdirilən siyahıdan müəyyən edə bilər. Həmin siyahıya sonradan dəyişiklik edilməsi də nazirliyin səlahiyyətində deyil".

E.Babayev əlavə edir ki, mənzilsiz qalan sözügedən şəhid ailəsi bunun üçün rayon icra hakimiyyətinə müraciət etməlidir:

"Nazirliyin burada edə biləcəyi bir şey yoxdur. O ailə icra hakimiyyətinə müraciət edib, adını siyahıya saldıra bilər".

Qeyd edək ki, Əmək və Əhalinin Sosial Müdafiəsi Nazirliyinin sifarişi ilə Goranboy rayonunda inşa olunmuş 6 mərtəbəli 54 mənzilli yaşayış evi müharibədə əlil olmuş vətəndaşların və şəhid ailələrinin istifadəsinə verilib. Mənzilləri Əmək və Əhalinin Sosial Müdafiəsi naziri Səlim Müslümov şəxsən təqdim edib.

Xatırladaq ki, əvvəlcədən nazirliyin saytına qoyulan sözügedən siyahıda həmin şəhid ailəsinin adının olmadığı görünür. Foto-skrinləri təqdim edirik.