Maliyyə naziri Samir Şərifov İstanbulda keçirilən Dünya İqtisadi Forumunda iştirak edir.

Axar.az xəbər verir ki, bu barədə Maliyyə Nazirliyinin rəsmi Feysbuk səhifəsində məlumat veriblər.

Məlumata deyilir ki, Türkiyənin İstanbul şəhərində "Regional İnkişaf üçün Əlavə İmkanların Yaradılması" mövzusunda Dünya İqtisadi Forumu keçirilir. Sentyabrın 28-də öz işinə başlayan Forumda Azərbaycan Respublikasını Maliyyə naziri Samir Şərifov təmsil edir.

70 ölkədən, 500-dən çox yüksək vəzifəli dövlət və hökumət rəsmiləri, iş adamları, beynəlxalq maliyyə institutları və vətəndaş cəmiyyəti nümayəndələri, tanınmış alim və ekspertlərin iştirak etdiyi forum çərçivəsində "Enerji dünyasının dəyişən şəkli: bölgənin yeni inkişaf hədəfləri, "Fiziki və rəqəmsal infrastrukturun gələcəyi" və s. mövzularda sessiyalar təşkil olunub.

Davos İqtisadi Forumu isveçrəli professor Klaus Şvebsin təşəbbüsü ilə 1971-ci ildə yaradılıb. 1987-ci ildən etibarən Davos İqtisadi Forumu Dünya İqtisadi Forumu adlandırılmağa başlanıb. Azərbaycan Respublikası 1995-ci ildən Dünya İqtisadi Forumunun fəal iştirakçısıdır. Son illərdə Azərbaycan ilə Davos Dünya İqtisadi Forumu arasında əməkdaşlıq inkişaf edərək yeni mərhələyə daxil olub, 2013-cü ilin aprelində Davos Dünya İqtisadi Forumu Prezident İlham Əliyevin iştirakı ilə Bakı şəhərində keçirilib.