Sürücülər "166" Yükdaşıma Xidmətindən narazılıq edirlər.

Axar.az-a verilən məlumata görə, sürücülərə ölkədaxili yollarda 20 tondan artıq yük daşımağa icazə verilmir. Qanunla 20 tondan artıq yük daşımaq qadağandır. Ancaq "166" Yükdaşıma Xidmətində çalışan sürücülərə bu qadağa şamil olunmayıb. Onlara 30-40 ton yük daşımağa şans verilir.

Sürücülər qeyd edirlər ki, Yükdaşıma Xidməti də bu üstünlükdən istifadə edir:

"Biz də çörək pulu qazanmaq istəyirik. Onlardan fərqimiz nədir? Niyə belə ayrı-seçkilik edilir? Bu dəqiqə Tovuz, Qazax, ölkənin müxtəlif istiqamətlərinə tikinti materialları daşıyan o sürücülərə həmin xidmətə aid olduqlarına görə icazə verilir ki, 30-35 ton aparsınlar. Bizə çatanda isə qanun yada düşür".

Xatırladaq ki, "Yükünüzü daşıyırıq" şüarı altında fəaliyyət göstərən "166" Yükdaşıma Xidməti təxminən iki ilə yaxındır fəaliyyət göstərir. Şirkət yüklərin daşınması, ofislərin və evlərin köçürülməsi, təmizlik xidməti, ev ustası xidməti, ev heyvanlarının daşınması, qablaşdırma, mebellərin sökülməsi və quraşdırılması, müxtəlif avadanlıqların quraşdırılması və yüklərin yerdəyişməsi kimi işləri həyata keçirir.