Millət vəkili Qənirə Paşayeva və Azərbaycanın fəal qadınları Şri-Lankanın paytaxtı Kolombo şəhərində keçirilən “Qadınların gələcəyi 2019” adlı II beynəlxalq konfransda iştirak ediblər.

Axar.az xəbər verir ki, dünyanın 20-dən artıq ölkəsindən çoxlu fəal qadının qatıldığı beynəlxalq konfransda qadınların ictimai-siyasi həyatda, dövlətin və cəmiyyətin idarə olunmasında, xüsusilə iqtisadiyyatda və biznesdə rolunun artırılması istiqamətində müzakirələr aparılıb.

Q.Paşayeva və nümayəndə heyətinin üzvləri beynəlxalq konfransda müzakirələr zamanı təkliflərlə çıxış ediblər və müxtəlif ölkələrdən gəlmiş fəal qadınlarla da görüşərək onlara Azərbaycanın tarixi, mədəniyyəti, inkişafı, iqtisadi imkanları, ölkənin 1-ci vitse-prezidenti Mehriban Əliyeva başda olmaqla Azərbaycan qadınlarının cəmiyyətdə rolu barədə danışıblar.

Görüşlərdə Ermənistanın işğal etdiyi Azərbaycan torpaqlarında törətdiyi vandalizm aktları və soyqırımlar, əsir və girov götürülmüş azərbaycanlılar, həmçinin Azərbaycanda qaçqın və məcburi köçkünlərin, qadın və uşaqların problemlərinin həlli istiqamətində görülən işlər barədə də danışıblar.

Müzakirələrdə qadınların dövlətin və cəmiyyətin idarə olunmasında, iqtisadiyyatda və biznesdə rolunun artırılmasının Azərbaycanın siyasətində önəmli yer tutduğunu vurğulanıb.

Q.Paşayeva Azərbaycanın Qərblə Şərq və Qərblə müsəlman dünyası arasında önəmli bir körpü olduğunu, mədəniyyətlərarası dialoq sahəsində gördüyü böyük işlər, əldə etdiyi uğurlar barədə danışıb.

Konfrans çərçivəsində tədbirin təşkilatçılarından olan Bilgilərin idarəetməsi üzrə beynəlxalq institutun həmtəsisçisi və icraçı direktoru İsanka P.Gamage ilə görüş də keçirilib və qadınlarla bağlı bu cür beynəlxalq konfransın əhəmiyyəti ilə bağlı fikir mübadiləsi aparılıb.