Azərbaycan Beynəlxalq Universitetinin fəaliyyətinə xitam verildikdən sonra diplomsuz qalan məzunların sənədləri prokurorluqda saxlanılır.

Axar.az-a müraciət edən bir qrup ABU məzunu yazır ki, onlar 5 ildir diplom almaq üçün dəridən-qabıqdan çıxıblar.

Məzunların sözlərinə görə, ABU-nun rektoru olmuş Elşad Abdullayevin üzərində cinayət işi var, ali məktəbin binasına həbs qoyulub və bu halda məzunların sənədləri də araşdırma üçün Baş Prokurorluğun Korrupsiyaya qarşı Mübarizə İdarəsinin müəyyən etdiyi yerdə saxlanılır.

Məzunlar qeyd edirlər ki, söhbət Dağıstan, Moskva filiallarından ABU-ya köçürülmüş tələbələrin diplomsuz qalmasından gedir. Onlara bildirilib ki, sənədlər Təhsil Nazirliyinə göndərildikdən sonra ayrı-ayrı təhsil ocaqlarına köçürülə, burada oxuyub, diplom əldə edə bilərlər.

Lakin bu cavabdan xeyli zaman keçib və ABU məzunları diplom üzünə həsrət qalıblar. Onlar redaksiyamıza müraciətdə xahiş edirlər ki, prokurorluq tezliklə araşdırmaları yekunlaşdırıb nazirliyə göndərsin.

Qeyd edək ki, Təhsil Nazirliyi ABU-nun fəaliyyətinə 2010-cu ildə xitam verib. Sabiq rektor E.Abdullayev isə Fransadadır və barəsində axtarış elan edilib. Sabiq rektora görə, minlərlə məzun diplom əldə edə bilməyib.