Bakıda fəaliyyət göstərən "İnfiniti" gecə barının fəaliyyətinə birdəfəlik xitam verilə bilər. Hazırda hüquq-mühafizə orqanları tərəfindən barla bağlı araşdırma aparılır.

Bu barədə Axar.az-ı məlumatlandıran mənbənin sözlərinə görə, "İnfiniti" barının əxlaqsızlıq yuvası kimi fəaliyyət göstərməsi barədə daxil olan məlumat polis tərəfindən araşdırılır.

Əslində bu obyektin fəaliyyəti ötən il dayandırılmalı idi. Çünki 2013-cü il mayın 15-də Bakı Şəhər Baş Polis İdarəsi "Nizami" kinoteatrına yaxın ərazidə yerləşən bu gecə barında əməliyyat keçirmişdi. Əməliyyat zamanı saxlananlar da olmuşdu. Məlum olmuşdu ki, "İnfiniti" gecə barına qadınların girişi pulsuzdur, kişilər isə giriş üçün pul ödəməlidir.

Qadınlar və kişilər əvvəlcə "İnfiniti"də qəlyanaltı stolu arxasında tanışlıq sövdələşməsi edib, sonra "Dalğa" saunasına gedirmişlər. Ancaq göründüyü kimi, polisin əməliyyatından sonra bar fəaliyyətini davam etdirib.

Amma bu fakt da "İnfiniti" ilə bağlı səs-küylü hadisələr xronologiyasının sonuncusu deyil. Hələ 2012-ci ildə barda baş verən münaqişənin sonu güllələnmə ilə nəticələnib. 29 yaşlı Ramal Bayramovun tanışı ilə barda etdiyi münaqişə bayırda atışmaya səbəb olub və gəncə 4 güllə atılıb. Bu faktın özü də barın reputasiyasına ciddi şəkildə zərbə vurub.

Qaynağımız bildirir ki, "İnfiniti"də müştərilər aldadılır, onlardan içmədiyi içkiyə görə fantastik məbləğdə hesab alınır, etiraz etdikdə isə barın içində əlbəyaxa başlanır. Belə ki, bara gələn müştəri qızla oturar-oturmaz xidmətçi ondan soruşmadığı sifarişi gətirir. Sonra bunu qızın sifarişi olduğunu deyib, adi bir lükörə görə 80-150 manat arası hesab alırlar.

Dekabrın 12-də isə bar rəhbərliyinin hörmətsiz bir hərəkəti - Heydər Əliyevin anım günü şadyanalıq edib, diskotekaya ara verməməsi obyektin sonunu yaxınlaşdırıb. İndi bar rəhbərliyini böyük cəza gözləyir. Polisin xəbərdarlığına məhəl qoymayıb diskotekanı davam edən "İnfiniti"nin sahibi əxlaqsızlıq yuvası işlətdiyinə görə məsuliyyətə cəlb oluna da bilər.