00:03

Bir qrup Ucar sakininin Polis Şöbəsinin qarşısında aksiya keçirməsi haqqında məlumat yayılıb.

Arqument.az hüquq müdafiəçisi Taleh Xasməmmədovun Feysbuk hesabında paylaşdığı məlumata istinadən xəbər verib ki, aksiyaya səbəb Ucar rayon Polis Şöbəsinin rəisi Tahir Quliyevin qohumu, Narkotik ticarətinə qarşı mübarizə bölməsinin rəisi Eldəniz İsmayılovun sakinləri təhqir etməsi olub:

"Aksiyadan sonra Eldəniz Quliyev vəzifəsindən azad edilib, 15 nəfər aksiya iştirakçısı həbs edilib".

Vurğulayaq ki, rayon polis şöbə (idarə) rəisinin bölmə rəisini işdən çıxarmaq səlahiyyəti yoxdur. Polis rəisi yalnız təqdimat verə bilər, təyinatı isə DİN başçısı həyata keçirir.

Məlumatı araşdırmağa çalışırıq.

***

Axar.az-ın yerli mənbədən əldə etdiyi məlumata görə, polis baş leytenantı Eldəniz İsmayılov Narkotiklərlə mübarizə bölməsinin rəisi deyil, inspektorudur və bu vəzifəyə yeni təyin edilib. Buna qədər isə o, Ucar rayon Pirkənd kəndində sahə inspektoru işləyib və polis rəisi ilə heç bir qohumluğu yoxdur.

Bildirilir ki, Eldəniz İsmayılov əslən Ucar rayonundan olan həmkarı ilə münasibətində guya kobudluğa yol verib və ucarlıların ünvanına aşağılayıcı ifadə işlədib. Mənbənin məlumatına görə, əslində belə hal olmasa da, rayon camaatından 10-dək şəxs bu söz-söhbətə aydınlıq gətirməsi üçün polis rəisi Tahir Quliyevin qəbuluna gedib.

Tahir Quliyev sakinlərlə görüşdə hər iki polis işçisini çağıraraq, onları tənbeh edib və işdən müvəqqəti olaraq uzaqlaşdırıldıqları barədə qərarını onlara elan edib. Polis rəisinin hansısa cəza seçəcəyi, yaxud onların işdən qovulması haqqında DİN-ə raport yazacağı barədə heç bir məlumat yoxdur.

Həbslər isə tamamilə təkzib edilir. Mənbəmizin verdiyi səhih bilgiyə görə, heç bir aksiya keçirilməyib və həbslər də olmayıb, sadəcə, xəbərdən narahat olan 10-dək ağsaqqal rəislə görüşüb.