Ana səhifə Toplum |
Məlum olduğu kimi, Yasamal rayonunda yerləşən və “Məhsul” stadionu kimi tanınan İdman-Sağlamlıq Kompleksi ötən ilin sentyabrından təmirə bağlanıb.
Axar.az xəbər verir ki, kompleksdə aparılan təmirlə əlaqədar görülən qazıntı işləri sakinləri narahat etmiş və stadionun yerində bina tikintisi aparılacağı düşüncəsi yaratmışdı. Məsələ ictimailəşəndən sonra Yasamal Rayon İcra Hakimiyyətindən stadionda aparılan qazıntının təmirlə əlaqədar olduğu bildirdilər.
Lakin bir çoxlarını hələ də stadionun tikintidən sonrakı vəziyyəti maraqlandırır.
Bununla bağlı saytımıza danışan İdman-Sağlamlıq Kompleksinin direktoru Alik Həsənov bildirib ki, stadion 1982-ci ildən sonra ilk dəfədir təmir edilir:
“Məhsul” stadionunda ancaq təmir işləri aparılır. Təmir işləri zamanı qazıntının da aparılması olduqca normaldır. Bu stadion 1982-ci ildə istifadəyə verilib. İstifadəyə verilən gündən indiyə qədər heç vaxt əsaslı təmir edilməyib. Bununla əlaqədar stadion əsaslı şəkildə idman kompleksi kimi təmir edilərək əhalinin və idmançıların istifadəsinə veriləcək. Hələlik işlərin nə vaxt yekunlaşacağı ilə bağlı nəsə demək tezdir. Təmir işləri üçün sənədlər hazırlanır, müəyyən eskizlər var ki, onlara baxılır. Biz bir neçə eskiz təqdim etmişik. Onlardan biri seçiləcək”.
Direktor stadionun təmirdən sonrakı durumu ilə bağlı da danışıb:
“Hazırda təsdiqlənən eskiz yoxdur deyə, konkret söz demək çətindir. Ümumi olaraq isə onu deyim ki, əsas meydança və qaçış zolaqları tam yenilənəcək, tribunalar təmir olunacaq. Stadion tamamilə yeni görkəm alacaq. İdman etmək üçün hər cür şərait yaradılacaq”.
Tarix
2020.02.11 / 14:19
|
Müəllif
Nigar İxtiyarqızı
|