Bu gün səhər saatlarında Bakı Metropoliteni QSC-də quraşdırılan terminallarda “BakıKart”ın balansının artırılması zamanı bəzi problemlər qeydə alınıb.

Axar.az əməkdaşı xəbər verir ki, səhər saat 08.00-09.00 radələrində terminallarda kartın balansına 10 qəpiklik yükləmək mümkün olmayıb.

Məsələ ilə bağlı “BakıKart”dan saytımıza bildirilib ki, metro stansiyalarında quraşdırılan terminallarda problem olması barədə onlara müraciət daxil olmayıb:

“Terminalların hamısı işlək vəziyyətdədir. Bu gün bizə bununla bağlı vətəndaşlar tərəfindən şikayət daxil olmayıb. Ola bilər ki, bəzi şəxslərin yükləmək istədiyi metal sikkələr əyri, paslı və ya yararsız vəziyyətdə olub. Belə sikkələri terminallar qəbul etmir”.

Xüsusi olaraq qeyd edək ki, 10 qəpikliyi daxil edərkən, terminallarda “10 qəpik qəbul edilmir” sözləri yazılırdı.