Ana səhifə Toplum |
“Zəka” Ziyalılar Məclisi İctimai Birliyi “Evdə qal, cəmiyyəti qoru” adlı ictimai monitorinq və məlumatlandırma kampaniyasına qoşulub.
Bu barədə Axar.az-a təşkilatın sədri Zahir Məlikli məlumat verib. Z.Məlikli bildirib ki, “Zəka” Ziyalılar Məclisi İctimai Birliyi olaraq QHT-lərə Dövlət Dəstəyi Şurası və Real TV-nin başlatdığı kampaniyasına qoşulublar:
“Bu gündən Azərbaycan Respublikasının Prezidenti yanında QHT-lərə Dövlət Dəstəyi Şurası və Real TV-nin başlatdığı ölkəmizdə koronavirus epidemiyasının geniş yayılmasının qarşısının alınmasına ictimai dəstəyi təmin etmək məqsədilə “Evdə qal, cəmiyyəti qoru” adlı ictimai monitorinq və məlumatlandırma kampaniyasına qoşuluruq.
Qeyd edim ki, təşkilatımız Şuranın İcbari Tibbi Sığorta üzrə Dövlət Agentliyi ilə birgə qrant müsabiqəsində qalib olub. Ölkədə və dünyada gözlənilməz situasiyanın yaranmasını nəzərə alaraq, “İcbari Tibbi Sığorta ilə bağlı maarifləndirmə tədbirlərinin keçirilməsi” adlı layihəmizin istiqamətini dəyişərək, koronavirusla bağlı maarifləndirmə işlərini həyata keçirməyi düşünürük.
Ümid edirəm ki, tibbi sahədə ixtisaslaşmış komandamızla birlikdə ölkə üçün ciddi problemə çevrilən koronavirusla mübarizədə Şuranın başlatdığı layihəni dəstəkləyəcək, ölkə vətəndaşlarının maarifləndirilməsi, onların risklərdən uzaq olması, sağlamlıqlarını qoruması istiqamətində öz töhfəmizi verə biləcəyik”.
Qeyd edək ki, Jurnalist Ekspert Mərkəzi də bu kampaniyaya qoşulub. JEM-in mətbuat xidmətindən yayılan məlumata görə, təşkilatın İdarə Heyəti pandemiya vəziyyətinin təhlükəli həddə çatdığını nəzərə alıb, ən optimal çıxış yolu kimi evdə qalmağı, Operativ Qərargahın tələblərinə şərtsiz əməl etməyi, dövlətin qərarlarını məsuliyyətlə yerinə yetirməyi cəmiyyəti bu bəladan qurtarmağın alternativsiz variantı kimi dəyərləndirir.
Məlumatda bildirilir ki, nəticələrin sevindirici olması birmənalı şəkildə maarifləndirmədən keçir. JEM bacardığı imkanlardan yararlanaraq, bu kampaniyaya real dəstək verməyə hazır olduğunu bəyan edir.
Tarix
2020.03.30 / 22:42
|
Müəllif
Axar.az
|