Niyaməddin Musayev onun olmadığı deyilən bir neçə populyar mahnı haqda da danışıb; "müəlliflik hüququm pozulur"; "İndi Bəxtiyar Vahabzadəni hardan tapım ki mənə şahidlik etsin?!"

Bu günlərdə müğənni Nadir Qafarzadənin Azərbaycan əsilli müğənni Sami Yusuf haqqında dediyi təhqiramiz sözlər qalmaqala səbəb oldu. Bu səbəbdən hətta müğənninin çıxış etdiyi ATV telekanalından qovulduğu da iddia olundu.

Bütün bu olaylar bir yana, müğənninin Sami Yusufun "Allahu Allah" mahnısı haqqında dediyi fikirlər çoxlarının diqqətini cəlb etdi. Nadir Qafarzadə iddia edirdi ki, bu mahnı əslində Niyaməddin Musayevin "Axtarma məni " mahnısıdır.

Həqiqətən də hər iki mahnını dinləyərkən eyni melodiyaya malik olduğu barədə fikir yaranır. Əslində bu mövzu çoxdan dartışılır. Niyaməddin Musayevin olduğu deyilən "Şahnaz təsnifi", "Gecələr" və başqa bir neçə mahnının da başqalarına məxsus olması barədə ciddi arqumentlər səsləndirilib bu gün kimi...

Mövzu ilə bağlı Niyaməddin Musayev Musavat.com-a maraqlı açıqlama verib.

Müğənni Sami Yusufun ifa etdiyi "Allahu Allah" mahnısı ilə müəllifi olduğu "Axtarma məni" mahnısının eyni olduğunu təsdiqləyib:

"1973-cü ildə əfqan mahnısı "Molla Mamacan"ı dinləyib, ondan bəhrələnərək "Axtarma məni" mahnısını bəstələdim. Sami Yusuf "Allahu Allah" mahnısını elə o mahnımdan götürüb. Ona deyən lazımdır ki, mən zamanında oxumuşdum da o mahnını... Sami Yusufu şişirdib qoyublar dağın başına. Hamı da bəh-bəhlə onu dinləyir. Həqiqət budur ki, o mahnının müəllifi mənəm! Məndən başqa onun sahibi yoxdur. Bir ara onu Məmməd Bağır da oxudu, amma yenə də bildirirəm ki, o mahnını yeganə sahibi mənəm".

Lakin bəziləri Niyaməddin Musayevin oxuduğu "Axtarma məni" mahnısının heç də ona məxsus olmadığını deyirlər. Hətta mahnının 1968-ci ildə Bahadur Hüseynov tərəfindən bəstələndiyi, ilk ifaçısının da Yaqut Səfərova olduğu iddia edilir. Deyilənə görə, Müəllif Hüquqları Agentliyində mahnı Bahadur Hüseynovun adına qeydiyyatdan keçirilib.

Niyaməddin Musayev bu iddialara da cavab verib:

"Bu söz-söhbət uzun müddətdir ki, gedir və təəssüf ki, bu gün də davam etməkdədir. Bir dəfə telekanalların birində Bahadur adlı tanımadığım bir şəxsi çıxartdılar ortalığa ki, bəs Niyaməddin müəllim, deyilənə görə "Axtarma məni" mahnısı bu oğlan yazıb. Onda həmin oğlandan soruşdum: "Ay oğlum, bu mahnını sən neçənci ildə yazmısan?". Cavab verdi ki, 1978-ci ildə. Onda ona dedim ki, "sənə ayıb olsun, mən bu mahnını 1973-cü ildə Azərbaycan televiziyasında yayımlanan "Səhər" verilişində ifa etmişəm".

Qeyd edim ki, mahnının sözlərinin müəllifi Ruzigar Əfəndiyevadır. Bir gün Ruzigar sözləri götürüb yanıma gəldi ki, bəs belə bir sözlər var, mən də o sözlərə mahnı yazdım. Beləliklə, mahnım yarandı. İndi bəzi "pəhlivanlar" çıxıb ortalığa, mahnıma sahib çıxmaq istəyirlər. Onlar adamda allergiya yaradırlar. Deyərdim ki, bu dəhşətdir!".

N.Musayevin müəllifi olmadığı iddia edilən mahnılar içərisində "Gecələr" mahnısı da var. Azərbaycanın məşhur şairi olan Bəxtiyar Vahabzadənin sözlərinə olan bu mahnını da deyilənə görə, Bəhram Nəsibov bəstələyib və ilk ifaçısı da 1974-cü ildə Rəhilə Həsənova olub.

Bu arada bəzi araşdırmalarda o da qeyd edilir ki, Bəhram Nəsibov Azərbaycanın ən məşhur və populyar mahnılarının müəllifidir. Lakin ali musiqi təhsili olmadığına görə sovet qanunları Bəhram Nəsibovun adının çəkilməsinə icazə verməyib. Bunun nəticəsində onun mahnıları hansısa təsnif kimi təqdim olunub. İddia olunur ki, Niyaməddin Musayev də bunu fürsət bilərək B.Nəsibovun əksər məşhur mahnılarını öz adından yayımlayıb.

İddia edilir ki, "Gecələr" mahnısının ilk təqdimatı Bəhram Nəsibovun oğlunun ad gününə təsadüf edib və Niyaməddin Musayev də həmin məclisdə iştirak edib. Rəhilə Həsənova mahnını təqdim edərkən "Bəhramın bəstəsidi" kimi qeyd edib. Hətta 1988-ci ildə Bəhram Nəsibovun xatirə gecəsində "Gecələr" mahnısını ifa edən Elza Qaybalıyeva da müəllif kimi Bəhram Nəsibovun adını çəkib.

Niyaməddin Musayev isə açıqlamasında "Gecələr" mahnısının hansısa qarmonçalana aid olduğunu deyib:

"Bu mahnının da ilk ifaçısı mənəm. Bir qədər sonra mahnını Rəhilə Həsənovaya verdim, biz bir yerdə çalışırdıq. Onda mən Filarmoniyada işləyirdim. Həmin dövrdə Sara Qədimova, Şövkət Ələkbərova, Əbülfət Əliyev bu mahnımı çox sevirdilər. Mahnının lent yazısı 1978-ci ildə işıq üzü gördü.

Mahnının musiqisi bir qarmon ifaçısına məxsusdur, adını hazırda unutmuşam. Onun haqqında daha çox müğənni Zöhrə Abdullayeva bilir. Əgər Zöhrə xanımı bu barədə danışdırsanız sizə daha yaxşı məlumat verər. Bildiyiniz kimi, mahnının sözləri görkəmli şairimiz Bəxtiyar Vahabzadəyə məxsusdur. Zamanında Bəxtiyar müəllim mənə deyirdi ki, Niyaməddin, bu mahnını necə gözəl oxumusan". İndi rəhmətliyi hardan tapıb şahid kimi danışdıraq?

Bəhram Nəsibovun qızı çıxıb deyir ki, bu mahnını mənim atam yazıb. Halbuki, Bəhram mənim çox yaxşı dostum idi və özü də bu barədə demişdi ki, mahnı onun deyil".

Müğənni digər mahnılarından da söz açıb:

"İndi də ortalığa çıxıb deyirlər ki, "Sevmirdim ki, mən" mahnısı da başqasına aiddir. Bunu necə deyirlər anlaya bilmirəm... "Elə bəndəm" mahnımı indi xalq mahnısı kimi qeyd edirlər. Bu mahnı da mənimdir, sahibi mənəm. "Bu qala daşlı qala" mahnısını xalq mahnısı kimi qələmə verirlər. Belə olmaz, müəlliflik hüquqlarımız pozulur. Mən hələ də məşhurluğunu itirməyən "Qurtuluş", "Röya", "Qiyamətə qalmaz", "El atası" mahnılarımı yüksək professional səviyyədə ifa edib lentə yazdırmışam".