Bakıda keçiriləcək birinci Avropa Oyunları ilə əlaqədar bəzi marşrut xətlərində edilən dəyişikliklər davam edir.

Axar.az xəbər verir ki, bu məqsədlə artıq 25 nömrəli xətt üzrə hərəkət edən marşrut avtobuslarının şəhərə girişi qadağan edilib.

Ənənəvi olaraq Qaraçuxur qəsəbəsi, Bakıxanov qəsəbəsi dəmir yolu stansiyasından keçməklə Koroğlu, N.Nərimanov və Gənclik metrostansiyalarından hərəkət edib Xarici İşlər Nazirliyinə qədər gedən marşrut xəttinin dayanacaqlarının sayı azaldılıb.

Artıq bir neçə gündür ki, 25 nömrəli xətt üzrə hərəkət edən marşrut avtobusları "Koroğlu" metrostansiyasından "Ulduz" metrostansiyasına gedir. Şəhərə girişinə qadağa qoyulan marşrutun dayanacaqlarının azalması sərnişin sayına da təsir edib. Belə ki, xüsusilə səhər saatlarında həddindən artıq sərnişinlə dolu olan avtobuslar, demək olar ki, hazırda boş olur. Sürücülər də yolun qısalmasından deyil, sərnişin sayının kəskin azalmasından narazılıq edir.

Yeni yol xəttinin müvəqqəti və ya daimi olacağı ilə bağlı hələlik heç nə məlum deyil. Lakin sürücülər bildirir ki, məhz Avropa Oyunları ilə əlaqədar avtobusların şəhərə girişi qadağan edilib, bu məqsədlə də dayanacaqlar azaldılıb.