Neftçala Rayon İcra Hakimiyyətinin başçısı Mirhəsən Seyidov və Azərsu ASC-nin müavini Etibar Məmmədov Neftçala rayonunda su təchizatının yaxşılaşdırılması istiqamətində görülən işlərə yerində baxış keçirib.

Neftçala Rayon İcra Hakimiyyətindən Axar.az-a verilən məlumata görə, layihənin icraçıları bildirib ki, Neftçala şəhərinin və ətraf yaşayış məntəqələrinin su təchizatının yaxşılaşdırılması üçün nəzərdə tutulan layihə çərçivəsində Salyan rayonu ərazisində su tutumu 7500 m3 olan su anbarının tikintisinə başlanılıb.

Neftçala şəhərinə çəkilən su xətti layihəsinin tikintisi nəticəsində əsasən çoxmənzilli binaların və fərdi yaşayış evlərində yaşayan 40.000 nəfərə yaxın şəhər sakininin içməli su xətti təchizatı və sayğaclaşdırılması, paralel olaraq Neftçala şəhərinin kanalizasiya sisteminin yenidən qurulması həyata keçiriləcək.

Neftçala rayonu ərazisində çəkilən 44 km-lik yeni su xəttinin 29 km-lik hissəsində işlərin yekunlaşdığını bildirilib. Su xəttinin qalan 15 km-lik hissəsində çəkilişin daha sürətli, daha tez başa çatması üçün əlavə canlı qüvvə və texnika cəlb olunub.