Ağdamın Quzanlı qəsəbəsində inşa edilən avtovağzal kompleksinin açılışı olub.

Axar.az xəbər verir ki, müasir tələblər səviyyəsində inşa olunan ikimərtəbəli avtovağzal binası gözləmə zalı, inzibati otaqlar, tibb, ana-uşaq, ibadət və istirahət otaqları, kassa, dispetçer, bufetdən ibarətdir. Ümumi sahəsi 448 kvadratmetr olan avtovağzal binası internet və müşahidə sistemi ilə təmin olunub.

Avtovağzal ərazisində həmçinin sərnişinlər və sürücülər üçün məişət, ticarət, iaşə xidməti göstərəcək obyektlər, avtobusların təmiri sexi də fəaliyyət göstərəcək.

Bu il Quzanlı qəsəbəsində mini futbol meydançası istifadəyə verilib, Heydər Əliyev prospektinin Ağcabədi rayonu istiqamətində geniş tikinti-abadlıq işləri aparılıb. Quzanlı qəsəbəsində Heydər Əliyev Mərkəzinin, kənd təsərrüfatı idarəsi və 360 şagird yerlik litsey binalarının, Xındırıstan kənd uşaq musiqi məktəbinin, Evoğlu kəndində 100 yerlik uşaq bağçasının tikintisi davam etdirilir.