ATV-nin efirində yayımlanan "Gündəlik" verilişində aparıcı Mətanət Əliverdiyevanın mayın 19-da Binəqədi ərazisində 15 nəfərin ölümünə səbəb olan yanğınla bağlı "Biz o faciəni lap belə, faciə etməməliyik. Oldu, elə bil bir külək idi, bir şey idi, bir film idi baxdıq, getdi" ifadəsini işlətməsi ANS şirkətini ciddi narahat edib.

Axar.az xəbər verir ki, sosial şəbəkələrdə tənqidlərlə yanaşı, ANS televiziyası da bu gün efirə gedən xəbər buraxılışlarında bir-birinin ardınca Mətanət Əliverdiyevanın bu sözlərindən istifadə edərək, onun sərt şəkildə vurulması kampaniyasına rəhbərlik edib. Hətta ana xəbər buraxılışında – 21:00-da efirə gedən bülletenində də bu məqama məxsusi süjet ayıran ANS nəinki Mətanət Əliverdiyavanı, ATV şirkətini də aparıcını müdafiə etməklə deyilən sözlərin məsuliyyətini öz üzərinə götürmək ittihamı ilə suçlayıb.

ANS ana xəbər buraxılışında bu süjetin ardınca şəhər sakinləri arasında keçirdiyi sorğunu da efirə verib və təbii olaraq rəyi soruşulan vətəndaşlar da Mətanət Əliverdiyavanın əleyhinə danışıb.

ANS-in xüsusilə Mətanət Əliverdiyevanın "Gündəlik" verilişinin bugünkü buraxılışında üzr istəməsindən sonra belə kampaniyaya ara verməməsinin və gün boyu bu mövzuda bir neçə süjetin ardınca ana xəbər buraxılışının iki əsas süjetini də təkrarən ATV aparıcısının əleyhinə yayımlamasının özəl səbəbi olmalıdır.

Qəribəsi odur ki, ANS ana xəbər bülletenindən sonra "İç xəbər"də də bu mövzuya yer ayırıb, şəhər küçəsindən hazırladığı "sorğu-süjeti" bir daha efirə verməkdədir. Şirkətə daxil olan "ANS press" saytının isə bir çox yazısı, o cümlədən manşetlərindən 2-si Mətanət Əliverdiyevanın sərt tənqidinə həsr olunub.

Xatırladaq ki, Mətanət Əliverdiyeva uzun müddət ANS şirkətlər qrupuna aid radioda çalışıb.

​