Azərbaycanda hər kəsi heyrətləndirən “qəza” təhlükəsizlik kameralarına düşüb.

Axar.az xəbər verir ki, sosial şəbəkələrdə paylaşılan görüntülərdə bir qadının qaçaraq özünü qarşıdan gələn avtomobilin önünə atdığı görünür.

Həmin an ətrafda heç kim olmasa da, dərhal əraziyə bir neçə nəfər gələrək hal “şahidi” rolunu oynamağa başlayır. İlk baxışda sürücünün qadını vurması təsəvvürü yaradılsa da, ətrafda olan təhlükəsizlik kameralarında əks olunan görüntülər tam əksini deməyə imkan verir.

Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Vaqif Əsədov məsələ ilə bağlı Oxu.az-a verdiyi açıqlamasında videogörüntüləri təəccüb içərisində izlədiyini bildirib:

“Vətəndaş açıq-aydın şəkildə özünü bilərəkdən avtomobilin önünə atmaqla hadisəni piyadanın vurulması kimi göstərməyə çalışır. Bu, çox təəssüf doğuran ssenaridir. Hadisənin nə zaman və dəqiq olaraq hansı istiqamətdə baş verdiyi barədə hələ məlumat yoxdur. Lakin məsələ mütləq şəkildə araşdırılacaq və mövzuya hüquqi qiymət verilməsinə çalışılacaq.

Hadisə ilə bağlı ilkin araşdırma rayon üzrə polis idarələrində olur. Düşünürəm ki, müstəntiqlər hadisəyə hüquqi qiymət verəcək. Hesab edirəm ki, burada sürücü yox, piyada qanunvericiliyə müvafiq olaraq layiqli cəzasını alacaq”.