Bu gün Milli Məclisin İnsan hüquqları komitəsinin sədri, Sosial Tədqiqatlar Mərkəzinin İdarə Heyətinin sədri Zahid Orucun 50 yaşı tamam olur.

Axar.az xəbər verir ki, Zahid Məhərrəm oğlu Orucov 1972-ci il fevralın 1-də Gədəbəy rayonunun Əlismayıllı kəndində anadan olub. 1989-cu ildə Azərbaycan Texniki Universitetinə qəbul olunub. Universiteti bitirdikdən sonra Azərbaycan Milli Elmlər Akademiyasının Fotoelektronika İnstitutunun aspiranturasına daxil olub.

Zahid Oruc 1990-cı ildən başlayaraq, Azərbaycanda xalq hərəkatı və milli azadlıq mübarizəsinə qoşulub, aktiv tələbə təşkilatlarının rəhbərlərindən biri kimi tanınıb.

1992-ci ildə Ana Vətən Partiyasının mətbuat xidmətinin rəhbəri, siyasi məsələlər üzrə müavini, 1999–2000-ci illərdə “Ana Vətən” qəzetinin baş redaktoru vəzifəsində çalışıb.

2000-ci ildə ilk dəfə Milli Məclisə üzv seçilib.

2019-cu il 11 fevralda Azərbaycan Respublikası Prezidentinin sərəncamı ilə Sosial Tədqiqatlar Mərkəzinin İdarə Heyətinin sədri təyin edilib. Hazırda İnsan hüquqları komitəsinin sədri, Azərbaycan-Almaniya, Azərbaycan-Böyük Britaniya, Azərbaycan-Danimarka, Azərbaycan-Özbəkistan parlamentlərarası əlaqələr üzrə işçi qruplarının üzvüdür.