Tanınmış jurnalist, uzun illər “Kino” qəzetinə rəhbərlik edən, 2002-ci ildən isə “Xalq qəzeti”nin mədəniyyət yazarı kimi çalışan Mehdi Mükərrəmoğlu vəfat edib.

Axar.az xəbər verir ki, bu barədə onun həmkarları məlumat yayıb.

Onun ölüm səbəbi açıqlanmayıb.

Qeyd edək ki, Mehdi Mükərrəmoğlu 15 aprel 1952-ci ildə Qubadlı rayonunun Dondarlı kəndində doğulub. Azərbaycan Dövlət Universitetini (indiki BDU) qırmızı diplomla bitirib, aspirantura təhsili alıb.

1975-ci ildə Azərbaycan Dövlət Kinematoqrafiya Komitəsində redaktor kimi işə başlayıb, 1977-ci ildən “Kino yenilikləri” qəzeti və “Yeni filmlər” jurnalının birgə redaksiyasında işləyib. Əvvəlcə bu redaksiyada redaktor, sonra məsul katib olub. 1992-ci ildən “Kino” qəzetinin baş redaktoru, “Azərkinovideo” İstehsalat Birliyinin ictimaiyyətlə əlaqələr şöbəsinin mütəxəssisi kimi çalışıb.

2002-ci ildən “Xalq qəzeti”nin mədəniyyət yazarı kimi fəaliyyətini davam etdirirdi.

5 kitab müəllifidir.