Biləsuvar Gömrük İdarəsinin "Qoşa Təpə" gömrük postunda İrandan Azərbaycana gələn İran vətəndaşının idarə etdiyi "Scania" markalı sərnişin avtobusundakı yüklərə rentgen qurğusuyla baxış keçirilib.

Dövlət Gömrük Komitəsindən Axar.az-a verilən məlumata görə, baxış zamanı avtobusun yük yerindən boşaldılan üzəri dəri örtüklü yastığın içərisindəki parça və sellofan kəsiklərin arasında kürə formalı 1 ədəd kütlə aşkar olunub.

Həmin kütlə açıldıqda isə içərisində üzəri toz halında istiotla örtülü daha bir kürə formalı bükümdə xalis çəkisi 495,00 qram olan narkotik vasitə - tiryək aşkar edilib.

Faktla bağlı araşdırma aparılır.