Yevlax şəhərində qətl hadisəsi baş verib.

Rayon Prokurorluğundan ANS-ə verilən məlumata görə, hadisə şəhərin 31-ci məhəllə, bina 4, mənzil 32 ünvanında - məcburi köçkünlərin məskunlaşdığı köçkün şəhərciyində qeydə alınıb. Həmin ünvanda yaşayan Kəlbəcər rayonundan məcburi köçkün, təvəllüdü hələlik istintaqla müəyyən edilməyən Maral Qara qızı Nəsibovanın üzərində küt alətlə törədilmiş xəsarətlər olan meyiti aşkarlanıb. Hazırda polis və prokurorluq əməkdaşları hadisə yerində araşdırma aparır. Onun hansı şəraitdə və kim tərəfindən öldürüldüyü dəqiqləşdirilir.

Öldürülən qadın həmin evdə tənha yaşayırmış.

Yevlax rayonunda sonuncu qətl hadisəsi yanvar ayının 12-də qeydə alınıb. Şəhərin 2 saylı musiqi məktəbinin həyətində, məktəbdə piano müəlliməsi işləyən 1980-cı il təvəllüdlü Ahu Nadir qızı Hüseynova qardaşı, 1982-ci il təvəllüdlü Veysəl Nadir oğlu Hüseynov tərəfindən bıçaqlanıb. Çoxsaylı bıçaq xəsarətləri alan qadın hadisə yerindəcə dünyasını dəyişib.

Hadisəyə səbəb Ahu Hüseynovanın boşanması, boşandıqdan sonra haqqında müəyyən söz-söhbətin dolaşması olub. Qardaşı Nadir Hüseynov yaranan söz-söhbət xoşuna gəlmədiyi üçün bacısını izləyib və məktəbin həyətində onu öldürüb.