Mətbuat Şurasının sədri, millət vəkili Əflatun Amaşov "Gündəlik Teleqraf" Media Qrupunu ziyarət edib.

Daha sonra Axar.az-ın kollektivi ilə görüşən Əflatun Amaşov cəbhədə baş verən hadisələrdən söz açıb.

Millət vəkili hərbi əməliyyatlar zamanı jurnalistlərin peşəkar davrandığını, cəmiyyətə dəqiq və dolğun informasiya verdiyini dedi. O, informasiya mübarizəsinin hazırda daha kəskin davam etdiyini, bu istiqamətdə xarici dildə versiyaları olan KİV-lərin üzərinə böyük məsuliyyət düşdüyünü xatırladıb və bu cür media qurumlarına dəstəyin vacib olduğunu diqqətə çatdırıb.

Azərbaycan-Ermənistan təmas xəttində vəziyyətin gərginləşdiyi məqamda onlayn medianı, o cümlədən Axar.az-ı diqqətlə izlədiyini, jurnalistlərin vətəndaş münasibəti göstərdiyini və gecə-gündüz çalışdığını vurğulayan millət vəkili KİV işçilərinə təşəkkür edib:

"Jurnalistlərin böyük əksəriyyəti təkcə işlədikləri media qurumlarında deyil, sosial şəbəkələrdə də aktiv oldular və cəbhədən doğru-dürüst xəbərlərin yalnız oxucularına yox, sosial şəbəkədə olan istifadəçilərə də çatdırılmasında rol oynadılar. Buna görə hamınıza təşəkkür edirəm və inanıram ki, bundan sonra da işimizi bu istiqamətdə inkişaf etdirəcəyik".

Ə.Amaşov həmçinin onlayn medianın maddi-texniki bazasının gücləndirilməsinə indi daha böyük ehtiyac duyulduğunu bildirib və bu barədə lazımı layihələrin işləndiyini qeyd edib.