Suraxanı Rayon Polis İdarəsinin Narkotiklərlə Mübarizə bölməsinin əməkdaşlarının keçirdikləri əməliyyat tədbiri nəticəsində Bakı şəhər sakini, 60 yaşlı Vahid Bəhramov saxlanılıb.

Axar.az xəbər verir ki, onun yaşadığı Bülbülə qəsəbəsi, 2-ci Bülbülə küçəsi, ev 24-də külli miqdarda narkotik vasitə olan qurudulmuş marixuana və çətənə kolları aşkarlanıb.

Saxlanılaraq idarəyə gətirilən Vahid Bəhramov Region TV-yə narkotiki öz istifadəsi üçün əkib-becərdiyini bildirib:

"Əkmişəm ki, özüm çəkim. Bir ovuc toxum var idi, səpdim yerə, bu çıxdı. Su da verdim, bir az böyüdü. Ay kişi, 40 ildir mən bunun çəkəniyəm. 4-5 aydır xərçəng xəstəsiyəm. Ağrıya dözə bilmirdim, onu çəkəndə canım rahat olurdu, gecələr rahat yatırdım".

Lakin Vahid Bəhramovun evində narkotik vasitələri ölçmək üçün istifadə edilən tərəzinin aşkarlanması onun həmin narkotiki tək öz istifadəsi üçün əkməsi ilə bağlı fikrinin yalan olduğunu sübuta yetirir.

Artıq Suraxanı Rayon Polis İdarəsinin istintaq şöbəsində cinayət işi başlanıb. Araşdırmalar aparılır.