Valideyn komitələrinin əsas funksiyası məktəblə valideynlər arasında düzgün əlaqə qurmaqdır. Lakin bəzi hallarda onlar bahalı hədiyyələr almaq üçün pul toplamaq təşəbbüsü ilə çıxış edirlər ki, bu da təhsil mühitinə mənfi təsir göstərir. Müəllimi sevindirmək üçün mütləq bahalı hədiyyələr almaq lazım deyil. Əsas olan onun əməyinə dəyər vermək və minnətdarlıq ifadə etməkdir.

Bu sözləri təhsil eksperti İlqar Orucov Axar.az-a açıqlamasında 8 Mart – Beynəlxalq Qadınlar Günü münasibəti ilə bağlı Elm və Təhsil Nazirliyinin Məktəbəqədər və Ümumi Təhsil üzrə Dövlət Agentliyinin (MÜTDA) xəbərdarlığı haqda danışarkən deyib.

“Təəssüf edirəm ki, bu məsələ hələ də Azərbaycanın təhsil gündəmindən çıxmayıb. Halbuki müəllimin zəhmətini heç bir bahalı hədiyyə ilə ölçmək mümkün deyil. Ən böyük hədiyyə onun yetişdirdiyi uğurlu və savadlı şagirdlərdir. Müəllimlərə bahalı hədiyyələr vermək əvəzinə, simvolik bir gül və ya səmimi təşəkkür kifayətdir. Bu, həm müəllim üçün mənəvi dəyər daşıyır, həm də valideynlər üçün əlavə maliyyə yükü yaratmır”, - o bildirib.

Qeyd edək ki, Elm və Təhsil Nazirliyinin Məktəbəqədər və Ümumi Təhsil üzrə Dövlət Agentliyi (MÜTDA) Beynəlxalq Qadınlar Günü münasibəti ilə valideynlər və şagirdlər tərəfindən müəllimlərə hər hansı formada maddi və qeyri-maddi nemətlərin, qiymətli hədiyyələrin verilməsi, bu məqsədlə pul yığılması və sair halların baş verməsinin yolverilməzliyi ilə bağlı təhsil müəssisələrinə xəbərdarlıq edib.