Ağsuda ölümlə nəticələnən yol-nəqliyyat hadisəsi törətməkdə ittiham olunan şəxs hakim qarşısına çıxarılıb. Qəza zamanı dünyasını dəyişən şəxs və sürücü iş yoldaşı olublar.

Axar.az Musavat.com-a istinadən xəbər verir ki, VAZ 2106 markalı maşının sürücüsü, rayon sakini Nazim Abışov şəhər ərazisində hərəkətdə olarkən qəfildən idarəetməni itirərək daş hasara çırpılmışdı. Qəza zamanı avtomobildə olan sərnişin, Ağsu sakini Rövşən Əzizbəy oğlu Əmirov dünyasını dəyişmişdi.

Hər iki şəxs Əmək və Əhalinin Sosial Müdafiəsi Nazirliyinin Dövlət Sosial Müdafiə Fondunun Şirvan Regional filialının əməkdaşları olublar.

Mərhum Rövşən Əmirov aparıcı mütəxəssis vəzifəsində çalışıb. Nazim Abışov isə həmin filialın Ağsu şöbəsində aparıcı mütəxəssis vəzifəsində işləyib.

Hadisə vaxtı onlar iş başında olublar. Nazim Abışov bildirib ki, hadisə vaxtı özü də bilmədən idarəetməni itirib.

Abışovun sözlərinə görə, mərhumla yaxın dost olublar və baş verən hadisəyə görə peşmandır. Mərhumun ailəsi Nazim Abışovu bağışlayıb.

N.Abışov törətdiyi əmələ görə 2 il 6 ay müddətinə azadlıqdan məhrum edilib. Cəzasını məntəqə tipli cəzaçəkmə müəssisəsində çəkəcək. Barəsində seçilmiş başqa yerə getməmək haqqında iltizam növündə qətimkan tədbiri qüvvədə saxlanılıb.