Bu ilin iki ayında Azərbaycana gələn turistlərin sayı əvvəlki ilin eyni dövrü ilə müqayisədə 0.7 faiz azalaraq, 338 min 600 nəfər olub. Ötən ilin müvafiq dövrü ilə müqayisədə İsraildən gələnlərin sayı 3,9 dəfə, Tacikistandan 1,9 dəfə, Çindən 1,8 dəfə, İspaniyadan 1,7 dəfə, İordaniyadan 44,6 faiz, Hindistandan 44 faiz, Qırğızıstandan 25,7 faiz, Qazaxıstandan 21 faiz, Pakistandan 19,6 faiz, Misirdən 18,9 faiz, ABŞ-dan 17,4 faiz, Niderlanddan 16,5 faiz artsa da, AB-dən gələnlərin sayı 1,6 faiz, Körfəz ölkələrindən gələnlərin sayı 9,9 faiz, MDB dövlətlərindən gələnlərin sayı 9,2 faiz azalıb.

Axar.az xəbər verir ki, bu sözləri millət vəkili, iqtisadçı alim Vüqar Bayramov bildirib.

O qeyd edib ki, 3 əsas istiqamət üzrə ölkəmizə gələn turistlərin sayında azalma qeydə alınıb:

“Azərbaycan üçün gəlmə turizmdə əsas regionlardan olan Körfəz ölkələrindən və eləcə də MDB dövlətlərindən gələnlərin sayının ayrı-ayrılıqda 10 faizə yaxın azalması ümumi turistlərin sayına mənfi təsir göstərib. Nəticədə bu ilin ilk ayını gəlmə turizm azalma ilə başa vurub.

Son statistika göstərir ki, gəlmə turizmdə yeni regionların payının artırılması, dayanıqlı turizm məhsullarından istifadə olunması və davamlılığın gücləndirilməsi üçün bu sahədə islahatların dərinləşdirilməsi daha da aktuallaşıb”.