Bakı-Tiflis-Bakı marşrutu üzrə sərnişin qatarlarının hərəkətinin bərpası ilə bağlı intensiv işlər aparılır.

Axar.az Teleqraf-a istinadla xəbər verir ki, bu barədə Gürcüstan Dəmir Yollarından bildirilib.

Qeyd olunub ki, bu prosesə dəmir yolu administrasiyaları, eləcə də məsələ ilə bağlı hər iki ölkənin aidiyyəti qurumları arasında danışıqlar və texniki detalların dəqiqləşdirilməsi daxildir.

“Tərəflər intensiv işləyir və hərəkətin bərpasının konkret tarixi daha sonra açıqlanacaq”, - qurumdan vurğulanıb.

Qeyd edək ki, ötən gün sosial şəbəkədə “Azərbaycan Dəmir Yolları”na aid qatarın Tiflisdə dəmir yolu vağzalında görünməsini əks etdirən fotoşəkil yayılıb. Həmin qatarın dəmiryol xətlərinin diaqnostikasını aparan qatar olduğu məlum olub.

Bundan öncə Gürcüstan tərəfi Bakı və Tiflis arasında dəmir yolu vasitəsilə sərnişin daşımalarının mayın 1-dən bərpa olunacağını bildirib.