Dünən paytaxtda baş verən avtomobil qəzası öz unikallığı ilə ictimaiyyətin diqqətini cəlb etdi və bir sıra müzakirələri gündəmə gətirdi. Bu məsələlərdən biri taksi fəaliyyəti ilə bağlı mövcud boşluqların olması və verilən qərarların yetərsizliyi haqda fikirlərdir. Taksi fəaliyyəti ilə məşğul olan şəxslərin adekvatlığı ciddi şəkildə diqqət mərkəzində olmalıdır. Çünki taksidən istifadə edən vətəndaşlarımızın birbaşa həyati təhlükəsizliyi müzakirə mövzusudur.

Bu sözləri Axar.az-a millət vəkili Arzuxan Əlizadə Bakıda baş verən avtomobil qəzası və reklam qalmaqalı ilə bağlı fikirlərini bölüşərkən deyib.

Onun sözlərinə görə, qəza ilə bağlı müzakirələrdə diqqət çəkən digər bir məqam da təəssüf doğurdu və bu, insanlar arasında ən çox müzakirə olunan məsələrdən biri idi:

“Qəzadan sonra ”Embavud” mebel şirkəti baş verən qəzadan reklam məqsədilə istifadə etməyə cəhd etdi. Bu addım ictimaiyyət tərəfindən kəskin tənqid edildi.

Hesab edirəm ki, şirkət bu məsələ ilə bağlı açıqlama verməli, reklam çarxının qəza görüntüləri fonunda yerləşdirilməsinin səbəblərini izah etməli və ictimaiyyətdən üzr istəməlidir”.