Bakı seysmik cəhətdən həmişə risk altında olan bir ərazidə yerləşir.

Bu sözləri Axar.az-a açıqlamasında geoloq Mirismayıl Ağayev zəlzələ riski ilə bağlı danışarkən deyib.

“Şəhərin relyefi əsasən düzənliklər və təpəliklərdən ibarət olması zəlzələ dalğalarının daha sürətli yayılmasına şərait yaradır. Bayıl yamacları, Badamdar və Binəqədi kimi bölgələrdə isə torpaq sürüşməsi riski də var. Bu isə o deməkdir ki, təhlükə yalnız yeraltı təkanla bitmir.

Bakı sahillərinə yaxın yerləşən Abşeron arxipelaqı isə dənizdə başqa bir risk daşıyır. Buradakı adalar və dəniz dibi qatları zəlzələ zamanı çökməyə və dəyişməyə meyllidir.Tarix isə bu risklərin real olduğunu dəfələrlə sübut edib. 1842-ci ildə Bakı ətrafında baş verən böyük zəlzələ, 1902-ci ildə Şamaxıda yaşanan dağıdıcı hadisə və 2000-ci ildə Xəzər dənizində qeydə alınan 6.8 bal gücündə zəlzələ bunun açıq sübutudur.

Bundan əlavə, Abşeron yarımadası Azərbaycanın əsas neft və qaz yataqlarına ev sahibliyi edir. Güclü bir yeraltı təkan nəticəsində neft platformalarının zədələnməsi, qaz kəmərlərində qırılmalar, dənizə neft sızmaları və nəticə olaraq böyük ekoloji fəlakətlər baş verə bilər”, - geoloq bildirib.