“Qurban” dediyimiz anlayış bu gün bizim bildiyimiz mənada Qurani-Kərimdə yer alan “qurbanlıq” anlayışına uyğun gəlmir.

Bu fikirləri Axar.az-a ilahiyyatçı Elşad Miri Qurban bayramı ilə bağlı açıqlamasında səsləndirib.

İlahiyyatçının sözlərinə görə, ərəb dilində “qurban” sözü “yaxınlaşmaq” mənasını verir:

“Əslində, qurban anlayışı Həcc mərasimi zamanı (bizim başa düşdüyümüz mənada Həcc deyil) ora dəvət olunan insanlarla bağlıdır. Quranda bu çərçivədə hədiyyə olaraq kəsilən heyvanlar və verilən yeməklərdən bəhs edilir. Bu anlayış sırf həmin mərasimlə bağlıdır. “İsmayıl qurbanı” ifadəsi də doğru deyil, çünki Qurani-Kərimdə bu qurbanın konkret olaraq İsmayıla aid olduğu bildirilmir. Qurbanlıq anlayışı ilk insanlardan bəri mövcuddur. Bu o demək deyil ki, Nuh peyğəmbərin dövründə bu anlayış olmayıb”.

Elşad Miri qeyd edib ki, bu gün qurbanlıq sadəcə heyvan kəsmək kimi başa düşülür ki, bu da doğru yanaşma deyil:

“Məsələn, elə insan var ki, qurbanın dəyərini başqa şəkildə vermək istəyir. Kimisi isə sağlamlıq səbəbindən qoyun əti yeyə bilmir. Lakin hər kəsə məcbur şəkildə qoyun əti verilir. Bu da doğru deyil. Bir gün ərzində saysız-hesabsız heyvanın kəsilməsindənsə, insanların ehtiyacları nədirsə, o şəkildə təmin olunması daha məqsədəuyğundur”.

İlahiyyatçı bildirib ki, Qurani-Kərimdə qurbanlıqla bağlı bayram anlayışı yer almasa da, bu gün adət-ənənəyə əsaslanaraq bayram kimi qeyd olunur:

“Bildiyimiz kimi, bizim müstəqilliyimizlə və digər hadisələrlə bağlı müxtəlif bayramlarımız var. Bayramlar hər zaman meydana çıxa və zamanla dəyişə bilər. Əsas odur ki, xalq və cəmiyyətin həyatında iz buraxan hadisələr bayram kimi qeyd olunur. Bu baxımdan da hər hansı bir problem yoxdur”.