Küləkli hava tikinti işləri gedən ərazilərin sakinlərinə çətinlik yaradır. Həmin ərazilərdən biri də “Dərnəgül” metrosunun yaxınlığında olan yaşayış binalarıdır. “Dərnəgül” metrosunun deposu tikilən bölgədə külək səbəbindən havada tozluluq daha çox olur və sakinlər toz basdığı üçün evin qapı-pəncərəsini açıq qoya bilmir.

Bakı Metropoliteni QSC-dən Axar.az-ın sorğusuna cavab olaraq bildirilib ki, “Dərnəgül” stansiyası yaxınlığındakı depo tikintisi ilə əlaqədar həmin ərazidə torpaq qatı mütəmadi olaraq suvarılır və digər önləyici tədbirlər həyata keçirilir.

“Qeyd etdiyiniz məsələ bütün tikinti dövründə xüsusi nəzərə alınacaq. Bu məqsədlə ərazidə torpaq qatının suvarılması üçün müvafiq nəqliyyat vasitələri ayrılır. Küləkli havada nəzarət daha da gücləndirilir və hava haqqında proqnozlara uyğun olaraq əvvəlcədən müvafiq tədbirlər görülür. Hazırda da həmin ərazidə küləkli hava ilə əlaqədar nəzarət gücləndirilib, gün ərzində suvarma işləri aparılıb”, - məlumatda qeyd olunub.