YÜKSƏK PEŞƏKARLIQ VƏ AYDIN VƏTƏNDAŞ MÖVQEYİ
Azərbaycan dövlət müstəqilliyi son 23 il boyunca torpağımızı
qorumaq, mədəni və mənəvi həyatımızı qurmaq, qanunlar qəbul edib
ölkəni bu qanunlarla idarə etmək, SSRİ-dən sonra çökmüş
iqtisadiyyatı canlandırmaq və əhalini işlə və çörəklə təmin etmək
kimi böyük problemlərdən tutmuş vətəndaşlıq şüurumuza, milli
kimliyimizi dərk etmək səviyyəmizə, özümüzə və sözümüzə
münasibətimizədək – çox mürəkkəb və çətin sınaqlardan keçirtdi
bizi.
Milli kimliyi, müstəqil düşüncəni və ana dilini unutdurmağa
çalışan (nəticə tam tərsinə oldu!) sovet rejimindən sonra fikir və
vərdiş şablonlarını qırıb yeni bir həyat sistemi qurmaq, üstəlik
müharibə şəraitində, son dərəcə çətin, amma şərəfli bir işdir;
milli tariximizin parlaq bir səhifəsidir. Azərbaycan, bütün
qüsurlara və çətinliklərə baxmayaraq bu yolu gedir.
Bu mürəkkəb və ziddiyyətli keçid dönəminin ən ağır yüklərindən
biri – jurnalistikanın, mətbuatın, sözün çiyninə düşmüşdür.
Bu illərdə sözümüz iki cəbhədə mübarizə aparmışdır; həm öz
azadlığını təmin etmək, həm də dövlətin informasiya siyasətini
yerinə yetirmək, milli azadlığa xidmət göstərmək!
23 il ərzində siyasi həyatımız kimi, söz və mətbuat həyatımız da
çox ələndi, çox səslər eşitdik, çox üzlər gördük. Yunus Əmrə demiş,
"Qalanlara salam olsun!"
Bu gün salam vermək istədiklərimdən biri ictimaiyyətin yaxından
tanıdığı və sevdiyi dostumuz Qulu Məhərrəmlidir.
Mən onu televiziyalardan tanımışam: ekranda özünü aparmasından,
danışdığı sözdən, yürütdüyü fikirlərdən, dünyada və ölkəmizdə baş
verən hadisələrə münasibətindən, dialoqa dəvət etdiyi adamalardan,
tutduğu mövqedən...
Televiziya ekranı rentgen kimidir, adamın içini göstərir, həm də
rentgendən fərqli olaraq onun fikirlərinin, ruh aləminin içini
göstərir. Burda tamaşaçı gözündən yayınmağa yer yoxdur. Dəyişkən və
səbatsız dünya, ölkə içində gedən mürəkkəb proseslər... Belə bir
şəraitdə hər həftə, bəzən daha tez-tez siyasi icmalçı kimi ekrandan
bu olayları şərh etmək, incələmək və ölkənin maraqları baxımındən
dəyərləndirmək son dərəcə çətin işdir; burda yalnız bilik və nitq
qabiliyyəti yetərli deyil; dərin nəzəri hazırlıq, siyasi bilik,
məntiq, fəhm və nəhayət, ardıcıl vətəndaşlıq mövqeyi tələb olunur.
Məncə, Qulu Məhərrəmlinin Azərbaycan televiziyasında, "Səhər"
proqramından tutmuş "7 gün", "Gerçəklik" və s. proqramlara qədər,
əhatəli fəaliyyəti məhz bu tələblərə cavab verdiyinə görə qəbul
edilirdi. O ekranda yıpranmadı. Ekrandan cəmiyyətin içinə, onu
anlayanların ürəyinə yol tapdı.
Mənim Qulu Məhərrəmliylə tanışlığım da o illərdən
başlanmışdır.
"Xəzər" televiziyasında bir neçə dəfə verilişlərinin qonağı
olmuşam.
Azərbaycan televiziyası və radiolarında çalışanlar, şərhçilər,
icmalçılar, proqram aparıcıları, redaktorlar çoxdur. Bəziləri bütün
ömürlərini bu işlərə sərf edirlər. Qulu Məhərrəmlinin istedadı onun
bu çərçivələrdə qalmasına imkan vermədi.
O, praktiki jurnalistika ilə nəzəri jurnalistikanı birləşdirməyi
bacardı. Radionun, televiziyanın, internetin, mətbuatın dili, nitq
mədəniyyəti, mətbuat azadlığı haqqında onlarla məqalə, kitab,
dərslik yazdı. Bakı Dövlət Universitetinin Jurnalistika
fakültəsinin müəllimi kimi yeni jurnalist nəslinin yetişməsində
böyük xidmət göstərirdi. Radio və televiziya dili üzərinə
araşdırmaları ona filologiya elmləri doktoru elmi dərəcəsini
qazandırdı və bu gün BDU-nun professorudur.
Yeri gəlmişkən deyim ki, Qulu Məhərrəmlinin araşdırdığı sahələr
elm üçün yeni sahələrdir; burda ümumiləşmələr aparmaq, nəzəri
hökmlər vermək, istiqamətlər müəyyənləşdirmək son dərəcə çətindir.
Kürəsəlləşmə şəraitində internet və ya ekran dili haqqında bu
mühitin qəbul edəcəyi və təcrübi əhəmiyyəti olan söz söyləmək son
dərəcə çətindir və alim dostumuzun bu işlərlə ardıcıl məşğul olması
onun yüksək peşəkarlıq qabiliyyəti və cəsarətindən xəbər verir.
Bu qabiliyyət və təcrübənin nəticəsi onun kitablarında və
dərsliklərində əksini tapmışdır.
Qulu Məhərrəmli Azərbaycan mətbuat dilinin, televiziya, radio,
nəhayət məişət dilinin, ən başlıcası ədəbi dilimizin qorunması və
inkişafı yolunda yorulmadan çalışan, yazan, danışan, mübarizə
aparan əsil vətəndaş alimlərimzidən biridir.
Bu baxımdan mənim başçılıq etdiyim Azərbaycan Dil Qurumunun
fəaliyyəti ilə yaxından maraqlanmasını, müzakirələrimzin ən
prinsipial iştirakçılarından biri olunmasını da ayrıca
vurğulamalıyam.
Qulu müəllimin Azərbaycan Milli Elmlər Akademiyasına, Nəsimi
adına Dilçilik İnstitutuna dəvət edilməsinə, orda monitorinq
proqramları həyata keçirəcəyinə sevindim. Bu çox vacib, dilçiliyin
nəzəri, elmi tərəfiylə dilə cəmiyyədəki real münasibətləri
əlaqələndirməyə imkan verən bir işdir.
Bununla yanaşı, o Jurnalistikanın İnkişafına Yardım fondunun
başçısıdır və bu sahədə də səmərəli çalışacağına inanıram.
Dostumuzun geniş elmi, ictimai, pedaqoji fəaliyyəti haqqında çox
danışmaq olar. Məncə, bütün qeyd etdiyim sahələrdə Qulu
Məhərrəmlinin uğur qazanmasının, tamaşaçı, tələbə, oxucu, dost
sevgisi qazanmasının bir əsas səbəbi də onun nurlu, saf, səmimi bir
insan və qeyrətli vətəndaş olmasıdır. Bütün bunların bir-birini
tamamlaması insanın xoşbəxtliyidir.