Xüsusilə qış vaxtı havanı kirlədən maddələrin dumanla birləşməsilə görüş məsafəsi bəzən 1-2 metrədək azala bilər.

Axar.az Atv.az-a istinadən xəbər verir ki, dumanlı havada sürücü həm yaxşı görməli, həm də yaxşı görünməlidir.

Uzaq farları yandırmayın: Dumana daxil olarkən yaxın farları və ön duman farları yandırılmalıdır. Dumanda maşın sürərkən çox vaxt uzaq farlar yandırırlar, halbuki belədə yaxındakı dumanlı sahə işıq bəndinə dönüb qabağı görməyə mane olur.

Yaxın farları və ön duman farları yandırın: Dumanda sürücülərin yol verdiyi başqa bir səhv bütün farları söndürüb ancaq ön duman farları yandırmaqdır. Nəticədə qarşıdan gələn sürücülər maşının cizgilərini aydın görə bilmirlər və qəza ehtimalı artır.

Şüşəni açın: Dumanlı havada zəruri tədbirlərdən biri şüşəni açmaqdır ki, başqa maşınların siqnallarını aydın eşidə biləsiniz.

Ara məsafəyə fikir verin: Duman su buxarından ibarət olduğuna görə yolu isladır və əylənmə məsafəsi quru havaya nisbətən daha uzun olur. Belə ki, normal şərtlərdə 100 km/saat sürətilə gedərkən əylənmə məsafəsi 44-50 metr, dumanda isə 100 metrədək olur. Odur ki, məsələn, 60 km/saat sürətilə gedən maşın 60 metr ara məsafəsi qoymalıdır.

Sol zolağa keçməyin: Dumanlı havada bu əməliyyata qətiyyən girişməyin, çünki görüş məsafəsinin və sürətin az olduğu dumanlı havada qarşıdan gələn avtomobillə toqquşma ehtimalı da artır. Amma mütləq sol zolağa keçmək lazımdırsa, farla və siqnalla ətrafdakıları xəbərdar edin.

Maşını saxlayanda sayrışan işıqları yandırın: Hansısa çətinlik üzündən maşını yolun kənarında saxlayanda sayrışan işıqları yandırıb arxadan gələn sürücülərin maşınınızı görmələri üçün 100 metr arxada reflektor qoyun.

Yavaş sürün: Dumanlı havada, xüsusilə də şəhər içində piyadalar da aydın görünmür. Odur ki, şəhər içində maşını yavaş sürmək, yol kəsişmələrində mütləq dayanıb yolda adam olub-olmadığını yoxlamaq lazımdır. Bununla yanaşı dumanlı havada piyadaların da işıldayan fosforlu paltar geyməsi məsləhətdir.