Prezidentin məmurlara tövsiyə etdiyi "Naz Lifan" markalı avtomobillərin yeni modelinin istehsalına başlanır.

Axar.az-ın xəbərinə görə, "NAZ-Lifan X-50" və "NAZ-Lifan-820" modelləri yaxın vaxtlarda alıcılara təqdim ediləcək.

Zavod Azərbaycanda yeganə müəssisədir ki, avtomobillərin bütün hissələri burada yığılır. Bu da zavodda istənilən modeldə minik və yük avtomobillərinin istehsalına imkan verir.

Müəssisədə möhürləmə, qaynaq və boyama sahələrinin yaradılması istiqamətində işlər davam etdirilir. Bu isə ban hissələrinin sökülü vəziyyətdə gətirilməklə müəssisədə qaynaq olunmasına imkan verəcək.

Hazırda muxtar respublikada, Bakı, Sumqayıt, Gəncə, Neftçala, Xaçmaz və Qubada "NAZ-Lifan" markalı minik avtomobilləri ilə taksi xidməti göstərilir.

Qeyd edək ki, Naxçıvan Avtomobil Zavodu 2010-cu ildən fəaliyyətdədir. Zavodda Almaniya, İtaliya və Belçikadan gətirilmiş müasir texnoloji avadanlıqlar quraşdırılıb.

İstehsal prosesi konveyer üsulu ilə təşkil edilib. İlk vaxtlar müəssisədə "NAZ-Lifan" markası ilə istehsal edilən avtomobillər baqaj hissəsi salonda olan "320" (xetçbek) və baqaj bölməsi salondan kənarda yerləşən "620" (sedan) modellərindən ibarət olub.

Mühərrik və sürət qutusuna 2 il zəmanət verilən avtomobillərin satışı nağd və ya sərfəli kredit şərtləri ilə aparılır. Xatırladaq ki, dövlət başçısı məmurlara yerli istehsal olan maşınlardan istifadəni tövsiyə edib.