Ana səhifə Kult Ədəbiyyat |
Kult.az gənc şair Əyyub Məmmədovun şeirlərini təqdim edir:
Məzarlar da danışır
Məzarlar da zamanla,
Dostlaşıb tanış olur.
Bəzi daşlar orda da,
Fəhləyə məmur olur.
Məzar var ki, başında
Bir abidə ucalır.
Məzar var ki, başında
Adi bir daş dayanır.
Məzar var ki, il boyu
Həmişə yada düşür.
Məzar var, tarix boyu,
Heç ora yolun düşmür.
Məzar var, yanı hasar
Bir qoruğa bənzəyir.
Məzar var, kol-kos basır,
Kim olduğu bilinmir.
Adama elə gəlir,
O daşlar da danışır
Ona yaxın məzarla,
Öz dərdini paylaşır.
Şəhriyar
Bir dahi uyuyur doğma torpaqda
Adı Şəhriyardır, özü dəryadır.
Sözü, kəlməsi dürri-yektadır
Amalı türk olan bir bəxtiyardır.
Bir görmək istədi, öz millətini
Çəkdi daxilində acı zilləti.
Qəlbi bu eşqlə hey çırpınırdı,
Gözündə qor kimi şimşək çaxırdı.
Yanıb odlanırdı, sözdə, sətirdə
Bir xalq, dövlət, torpaq üstündə
Vahid birliklə, ulu vəhdətlə,
Şamtək əriyirdi şeir, qəzəldə.
Azadlıq məlhəmin çəkib yaraya
Vətən nisgilinə dərman edirdi
O taylı-bu taylı doğma elinə,
Ürəyi qubarlı salam deyirdi.
Heydərbaba onsuz qalıb gileyli
Öz elində olub indi yadelli
Sarıbaba düşüb xeyli aralı,
Səsi gəlmir, qəlbi olub yaralı.
Neçə əsər yazılıbdır şəninə
Mahnı qoşub, söz deyiblər şeirinə
Adı düşmür cavan, qoca dilindən,
Öyrənirlər daim onu dərindən.
Alov kimi
Bu bahar da payız kimi
Sarı, qırmızı keçdi...
Yaşıllığı görmədim
Ya da gördüm, hiss etmədim.
Çoxdandı fəsilləri,
Yaman qarışdırmışam
Bircə sən qarışmırsan.
Beynimə qoyduğum kimi,
Yerində dayanmısan.
Dünən küləklə qar,
Yaman çovğun yaratdı
Bütün cismim üşüdü.
Təkcə başımdan başqa
Orda elə qalmısan,
İsti daş kömür kimi
Məni yaman qızdırır,
Xəyalın alov kimi...
Yarımçıq sevgilər
Məhəbbət yolunda yıxılmaq olar
Yetər ki, qalxmağa bir yolun olsun.
Ayrılıb, yenidən sevmək də olar
Yetər ki, sevməyə bir üzün olsun.
Bir ürək nə qədər sevgi daşıyar?
O olar, bu olar, o biri olar.
Qəlb boğça deyil ki, kim gəldi tuta
Axırda cırılıb, partlayıb daşa.
Demə, sevənlərim günahkar idi
Yarı yolda qoyub, tərk etdi məni
De, mən ürəyimi açıq qoymuşam,
Hər gələn atını oynadıb getdi.
Sən bir gün geriyə dönüb baxanda
Alnının qırışı çaşdırar səni
Yarımçıq sevgilər bir alov kimi
İçində qaynayıb, yandırar səni.
Tarix
2019.12.02 / 18:11
|
Müəllif
Əyyub Məmmədov
|